تۇركىستان تۇركى الەمىنىڭ 2017-جىلعى مادەني استاناسى بولادى
تۇركسوي ۇيىمىنا مۇشە مەملەكەتتەردىڭ مادەنيەت مينيسترلەرىنىڭ 34- تۇراقتى كەڭەسىندە جانە «شەكي -تۇركى الەمەنىڭ 2016-جىلعى مادەني استاناسى» جىلىنىڭ اياقتالۋىنا ارنالعان راسىمدە وسىنداي شەشىم قابىلداندى.
تۇركسوي ۇيىمىنا مۇشە مەملەكەتتەردىڭ مادەنيەت مينيسترلەرىنىڭ 34- تۇراقتى كەڭەسىنىڭ كۇن تارتىبىنە اتالمىش ۇيىمنىڭ وتكەن جىلعى اتقارعان ىستەرى، ءداستۇرلى فەستيۆالدارعا قاتىستى تالقىلاۋلار، اعىمداعى جانە جاڭا جوبالارعا قاتىستى ماسەلەلەر ەنگىزىلگەن بولاتىن.
«شەكي قالاسى 2016-جىل بويىنا بۇكىل تۇركى الەمىنىڭ مادەنيەت قايراتكەرلەرىن جوعارى دەڭگەيدە قارسى الدى. تۇركى الەمىنىڭ مادەني استاناسى مارتەبەسىنىڭ ارقاسىندا ازەربايجاننىڭ وسىناۋ تاريحي قالاسى ءوزىن الەمگە پاش ەتتى. بۇگىنگى شارادا قازاقستاننىڭ تۇركىستان قالاسى تۇركى الەمىنىڭ 2017-جىلعى مادەني استاناسى بولىپ سايلاندى»، - دەدى تۇركسوي ۇيىمىنىڭ باس حاتشىسى دۇيسەن قاسەيىنوۆ.
سونىمەن بىرگە ول تۇرىك مادەنيەتى حالىقارالىق ۇيىمى (تۇركسوي) تۇركى حالىقتارى اراسىندا دوستىق قارىم-قاتىناستى قالىپتاستىرىپ، باۋرلاستىق بايلانىستاردى نىعايتۋ، تۇركى حالىقتارىنا ورتاق مادەنيەتتى وسكەلەڭ ۇرپاققا جەتكىزىپ ونى ناسيحاتتاۋ باعىتىندا 20 جىلدان استام ۋاقىتتان بەرى ءتيىمدى جۇمىستار اتقارىپ كەلە جاتقاندىعىن اتاپ ءوتتى.
تۇركسوي ۇيىمىنىڭ ەڭ ءساتتى جوبالارىنىڭ ءبىرى - 2012-جىلدان باستاپ، تۇركى الەمىنىڭ مادەني استانالارىن سايلاۋ بولىپ تابىلاتىندىعى ايتىلدى.
