ەكسپو-2017 كورمەسىنە كەلەتىن تۋريستەر قازاقتىڭ ۇلتتىق تاعامدارىن دايارلاۋدى ۇيرەنەدى
«وبلىستا جەتى نەگىزگى تۋريستىك پاكەت ازىرلەنىپ وتىر، وسى رەتتە بۋراباي كۋرورتى دا مىندەتتى تۇردە قامتىلادى»، - دەدى شىناربەك باتىرحانوۆ «قازاقپارات» تىلشىسىنە بەرگەن سۇحباتىندا.
ونىڭ سوزىنە قاراعاندا، اقمولا وبلىسىنداعى ءبىرقاتار اۋدانداردا ەتنواۋىلدار قۇرىلادى جانە وسى جەردە مەيماندار قازاق حالقىنىڭ سالت- داستۇرىمەن تەرەڭىرەك تانىسۋعا مۇمكىندىك الادى.
«اتاپ ايتقاندا، ۇلتتىق ويىندار مەن ءداستۇرىمىزدى ءبىز قوناقتارعا كورسەتەمىز. قولونەر شەبەرلەرى كيىزدەن، مەتالدان، اعاشتان جاسالعان بۇيىمدارىن كوپشىلىك نازارىنا ۇسىنادى. ءبىز شەتەلدىكتەردى حالقىمىزدىڭ كونەدەن ۇمىتىلماعان سالتىمەن تانىستىرامىز. وسى ورايدا ولار كيىز ۇيلەرگە قونىستانىپ، تاعامداردى ازىرلەيدى. قىمىزدى جانە شۇباتتى دايارلاۋدىڭ قىر- سىرىن مەڭگەرىپ، قولونەرمەن اينالىسادى. بۇگىندە شەتەلدەن كەلگەن قوناقتاردى بەس جۇلدىزدى قوناق ۇيمەن تاڭداندىرا المايسىڭ، سوندىقتان ءبىز نەگىزگى باسىمدىقتى ۇلتتىق داستۇرىمىزگە بەرمەكپىز. تالداۋ شارالارى كورسەتىپ وتىرعانداي، قازاق حالقىنىڭ وزىندىك ءداستۇرى مەيماندار تاراپىنان ايتارلىقتاي قىزىعۋشىلىق تۋدىراتىن بولادى»، - دەدى شىناربەك باتىرحانوۆ.
اۆتور: رۋسلان عابباسوۆ
