ەكسپو-2017 كورمەسىنە ءجۇزىنشى مەملەكەت قاتىساتىنىن قۋاتتادى
«باسا كوڭىل اۋداراتىن نەگىزگى جاڭالىقتاردىڭ بىرىنە توقتالاتىن بولساق، بۇگىن 2017 كورمەسىنە قاتىسۋعا ءجۇزىنشى مەملەكەت جانە 17 حالىقارالىق ۇيىم ءوز كەلىسىمىن رەسمي تۇردە راستادى. كەلىسىم بەرگەن ءجۇزىنشى مەملەكەت وڭتۇستىك افريكا رەسپۋبليكاسى. افريكاداعى ەڭ دامىعان ەلدەرىنىڭ ءبىرى ەكسپو-2017 كورمەسىندە «جاسىل» ەنەرگەتيكا سالاسىنداعى وزدەرىنىڭ ۇزدىك تەحنولوگيالارىن كورسەتپەك. باستاپقىدا كورمەنىڭ تىركەۋ قۇجاتتاماسىندا 100 مەملەكەت پەن 10 حالىقارالىق ۇيىمنىڭ قاتىسۋى جوسپارلانعان بولاتىن. بۇگىن كورمەنىڭ باستالۋىنا توعىز اي ۋاقىت قالعان مەرزىمدە بۇل جوسپار ورىندالدى»، - دەدى ر. جوشىبايەۆ.
بۇعان دەيىن كورمەگە قاتىساتىندىعىن برازيليا راستاپ، 99- قاتىسۋشى مەملەكەت اتانعان بولاتىن.
«بۇگىندە قاتىساتىندىعىن راستاۋ بويىنشا تاعى دا ءبىرقاتار ەلدەرمەن كەلىسسوزدەر ءجۇرىپ جاتىر. حالىقارالىق قاتىسۋشىلاردى تارتۋ بويىنشا ناۋقان بيىلدىڭ اياعىنا دەيىن جالعاسادى. قازىرگى كەزدە سەكسيالار كوميسسارلارىن تاعايىنداۋ جۇمىستارى مەن قاتىسۋ تۋرالى كەلىسىمدەرگە قول قويۋ شارالارىن جۇرگىزۋدەمىز»، - دەدى ول.
بەلگىلى بولعانداي، كەلەسى اپتانىڭ باسىندا استاناعا حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس كەلەدى دەپ جوسپارلانىپ وتىر.
اتاپ ايتقاندا، اعىمداعى جىلدىڭ قازانىندا حالىقارالىق پاۆيلونداردا بارلىق قۇرىلىس جۇمىستارىن اياقتاۋ جوسپارلانىپ وتىر. وسى رەتتە بۇل پاۆيلوندار قاتىسۋشى ەلدەرگە بەرىلەدى.
حالىقارالىق مامانداندىرىلعان كورمە استانادا 2017 -جىلى 10 - ماۋسىمنان باستاپ 10 - قىركۇيەككە دەيىنگى ارالىقتا وتەدى.
اۆتور: رۋسلان عابباسوۆ
