ا. ەسىموۆ ەكسپو-2017 كورمەسىنە العاشقى بيلەت ساتىپ الۋشىنى قۇتتىقتادى
ءبىرىنشى بيلەتتى ونلاين ارقىلى استانا قالاسىنىڭ 24 جاستاعى تۇرعىنى ولجاس وڭالوۆ ساتىپ الدى.
ەرەكشە وقيعا رەتىندە كورمە ۇيىمداستىرۋشىسى ۇلتتىق كومپانيا باسقارماسىنىڭ ءتوراعاسى احمەتجان ەسىموۆ العاشقى بيلەتتى ساتىپ الۋشىعا ەستەلىك سىيلىق بەرىپ، ونى ءساتتى ساتىلىمىمەن قۇتتىقتادى.
«ءبىزدىڭ كومپانيا ءۇشىن كورمەگە بيلەتتى العاشقى ساتىپ الۋشى استانا تۇرعىنى بولعانى قۋانتادى. «ەكسپو-2017» كورمەسى استانادا وتەدى عوي. استانالىقتار سياقتى قازاقستاندىقتار دا ونلاين- ساتۋ ارتىقشىلىقتارىن پايدالانىپ، جەڭىلدىكپەن بيلەت ساتىپ الادى دەپ ۇمىتتەنەمىز»، - دەدى ول.
«بيلەتتى العاشقى بوپ ساتىپ العانىما قۋانىشتىمىن. كورمەگە وتباسىمىزبەن بارۋ ءۇشىن ەكسپو- نىڭ قازاقستاندا وتسە دەپ ارماندايتىنمىن. الدىندا شانحايداعى كورمەگە بارعانمىن. سول كەزدە ەرەكشە اسەر الدىم. وزىمە، تۋىستارىما 4 بيلەت الدىم. جەڭىلدىكپەن ساتىلعانى قىزىقتىردى. بارلىق قازاقستاندىقتاردى كورمەگە كەلۋگە شاقىرامىن. جاڭا، ەرەكشە وقيعالاردىڭ كۋاسى بولاتىنىمىزعا سەنىمدىمىن»، - دەدى و. وڭالوۆ.
ەسكە سالساق، بۇگىننەن باستاپ «ەكسپو-2017» كورمەسىنە ونلاين بيلەتتەر ساتىلا باستادى. بيلەت باعدارلاماسى ءار قازاقستاندىق كورمەگە بارا الاتىنداي مۇمكىندىكپەن ازىرلەنگەن. بيلەتتى www.tickets.expo2017astana.com. سايتتارىنان الۋعا بولادى.
بيلەت باعدارلاماسى جايلى 2016 -جىلعى 13 -ماۋسىمدا و ق ق بريفينگتە تولىعىراق ايتىلاتىن بولادى.
