گەننادي گولوۆكين: استانادا جەكپە-جەكتى 2017-جىلى ۇيىمداستىرۋعا بولادى
بۇل تۋرالى ول استانادا جانكۇيەرلەرمەن بولعان كەزدەسۋىندە حابارلادى.
«بۇگىن ءبىز امەريكالىق HBO تەلەارناسىنىڭ كومانداسىن الىپ كەلدىك. ولار ءبىزدىڭ بۇل جەكپە-جەكتى قانشالىقتى جوعارى دەڭگەيدە وتكىزە الاتىندىعىمىزدى باعامدايتىن بولادى. مەنىڭشە، بۇل جەكپە-جەك از دەگەندە كەلەسى جىلى وتكىزىلەر ەدى. ەگەر بۇنىڭ بارلىعى قولدان كەلسە»، - دەدى گ. گولوۆكين جانكۇيەرلەرگە بەرگەن جاۋابىندا.
چەمپيوننىڭ ءسوزى بويىنشا، قازىرگى ۋاقىتتا GGG جەكپە-جەگىن استانادا «ەكسپو-2017» كورمەسى اياسىندا وتكىزۋ مۇمكىندىگى بويىنشا كوپ دەڭگەيلى كەلىسسوزدەر وتۋدە.
«ءبىز كەلىسسوز جۇرگىزىپ جاتىرمىز. ءسوزسىز، جەكپە-جەكتىڭ ءبىرىن قازاقستاندا - ءوز جانكۇيەرلەرىڭ ءۇشىن وتكىزۋ مەنىڭ ويىمدا بار. ءبىزدىڭ ەلدە ناعىز الەم تانىعان داڭقتى چەمپيونداردىڭ قاتىسۋىمەن بارشا الەمگە دۇركىرەتىپ بوكس كەشىن ۇيىمداستىرساق قانەكي. ءبىزدىڭ ەل وعان لايىق ەمەس پە!؟»، - دەپ اتاپ ءوتتى گەننادي گولوۆكين.
بۇنىڭ الدىندا حابارلانعانداي، HBO تەلەارناسىنىڭ ءتۇسىرۋ توبى ورتا سالماقتاعى سۋپەرچەمپيون گەننادي گولوۆكين تۋرالى ارنايى جوبا ءتۇسىرۋ ءۇشىن قازاقستانعا كەلگەن بولاتىن. ءتۇسىرىلىم نەگىزىنەن، بوكسشىنىڭ تۋعان جەرى مايقۇدىقتا وتپەك.
اۆتور: جاسۇلان جولدىبايەۆ
