ەكسپو-2017 كورمەسىنە كەلگەن تۋريستەردى شارباقتىلىق شىراقشى ءوز ۇيىندە كۇتىپ الادى
بۇل تۋرالى شارباقتى اۋدانى اكىمىنىڭ الەۋمەتتىك ماسەلەلەر جونىندەگى ورىنباسارى ريزاگۇل نەعمانوۆا ءمالىم ەتتى، دەپ حابارلايدى pavlodarnews.kz.
- اربيگەن اۋىلىنان 12 شاقىرىم جەردە ورنالاسقان حازىرەت اتا كەسەنەسىنە تۋريستەر كوپتەپ كەلەدى. كەسەنەنىڭ ماڭىندا اعاشتان سالىنعان ساۋلەتتى ءۇي بار. الايدا كەيبىر قوناقتار جاقىن جەردە زيرات بولعاندىقتان، ول جەرگە قونۋدان باس تارتاتىن. سوندىقتان، كەسەنە شىراقشىسى ەرمەك راحمەتوۆ ءوز ءۇيىن قوناق كۇتۋگە بەرۋگە كەلىسىمىن بەردى، - دەدى اكىمنىڭ ورىنباسارى.
ر. نەعمانوۆانىڭ ايتۋىنشا، شەتەلدىك مەيمانداردى كۇتۋگە ارنالعان 15 ورىندىق باسپانا تۇرمىسقا جايلى. بيىل جاز ماۋسىمىندا تۇرعىن ءۇيدىڭ اينالاسىنا قورشاۋ ورناتىپ، مونشا تۇرعىزۋ جوسپارلانىپ وتىر. بۇل جۇمىستارعا اۋدان اكىمدىگى جانە اۋداندىق «ەرتىس ورمانى» رەزەرۆاتى كومەك قولىن سوزباق. - مۇندا جىلىنا 2000 عا جۋىق تۋريست كەلەدى. وسى جەردە جۇمىس ىستەپ جاتقانىما بەس جىلداي ۋاقىت بولدى. مەنىڭ اتام قوراباي عابدىلۋاحيت حازىرەتتىڭ ءىنىسى ءارى شاكىرتى بولعان، - دەدى ە. راحمەتوۆ.
ايتا كەتەرلىگى، شارباقتى اۋدانى اربيگەن اۋىلىنىڭ جانىندا شالداي ورمانىندا 2012 -جىلى بوي كوتەرگەن جاڭا كەسەنە حالىقتىڭ قاراجاتىنا سالىنعان. قۇرىلىس جۇمىستارىنا وبلىستىق قامقورشىلار كەڭەسى جەتەكشىلىك ەتكەن.
