جەتەكشى فين كومپانيالارى ەكسپو-2017 كورمەسىندە ەكو-ازىرلەمەلەرىن ۇسىنادى
ر. جوشىبايەۆ حەلسينكيدە فينليانديانىڭ ەكسپو كورمەسىنە قاتىسۋىنا جاۋاپتى جۇمىسپەن قامتۋ جانە ەكونوميكا، سىرتقى ىستەر مينيسترلىكتەرىنىڭ باسشىلارىمەن، سونىمەن بىرگە ەلدىڭ ىسكەر توپ وكىلدەرىمەن كەزدەستى. كەزدەسۋ وزەگى فينليانديانىڭ ەلوردادا وتەتىن ەكسپو حالىقارالىق كورمەسىنە قاتىسۋى بولدى.
«ەكسپو-2017» كوميسسارى فينليانديانىڭ ەكونوميكا مينيسترىمەن كەزدەسۋى بارىسىندا ەكىجاقتى ىنتىماقتاستىقتىڭ، ونىڭ ىشىندە «جاسىل» تەحنولوگيا سالاسىنداعى بايلانىستاردىڭ كەڭەيۋىنە بۇكىل الەمگە تانىمال كورمەنىڭ سەپتىگى مول ەكەندىگىن اتاپ ءوتتى. قازاقستان بۇل ەلدىڭ بالاما ەنەرگيا سالاسىنداعى كوشباسشىلىق ءرولىن ەسكەرە وتىرىپ، فين كومپانيالارىنىڭ ەكسپو-2017 كورمەسىنە بەلسەنە قاتىساتىندىعىنا ءۇمىت ارتادى.
ءوز كەزەگىندە و. رەن ءبىرقاتار فين كومپانياسىنىڭ كورمەنىڭ «بولاشاق ەنەرگياسى» تاقىرىبىنا زور قىزىعۋشىلىق تانىتىپ، استانادا ءوز ازىرلەمەلەرىن كورسەتۋگە دايىن ەكەندىگىن باسا ايتتى.
ال سىرتقى ىستەر ءمينيسترىنىڭ ورىنباسارى ماتتي انتتوننەنمەن كەلىسسوزدەر بارىسىندا قازاقستان-فين قارىم-قاتىناسىنىڭ جاي-كۇيى مەن ونى دامىتۋ كەلەشەگى تالقىلاندى.
ر. جوشىبايەۆ فين تارابىنان قازاقستاننىڭ 2017-2018-جىلدارى كەزەڭىندە ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە جانە ەلىمىزدىڭ د س ۇ- عا كىرۋ جونىندەگى كەلىسسوزدەر پروتسەسىنە قولداۋ بىلدىرگەنى ءۇشىن العىسىن ايتتى.
ەكى ەل ىنتىماقتاستىعىنىڭ مۇمكىنشىلىكتەرى «استانا ەكسپو-2017» تاقىرىبىنداعى بيزنەس كونفەرەنتسياسى اياسىندا ءوز جالعاسىن تاپتى. بۇل شارانى «جاسىل» جانە «تازا» تەحنولوگيالار سالاسىندا جۇمىس ىستەيتىن «Clean Tech Finland» فين كومپانيالارى قاۋىمداستىعى مەن «فيننەير» اۋە كومپانياسى ۇيىمداستىردى.
«فيننەير» اۋەكومپانياسى باسشىلىعىمەن وتكەن كەزدەسۋ بارىسىندا تۋريستىك جانە ىسكەرلىك ساپارلاردى ارتتىرۋ، 2017-جىلى ەكى ەلدىڭ ەلوردالارى اراسىندا تىكەلەي اۋە رەيستەرىن اشۋ بارىسىندا فيندىك تۋريستىك وپەراتورلارمەن ىنتىماقتاستىقتى جولعا قويۋ ماسەلەلەرى تالقىلاندى.
اۆتور: مارلان جيەمباي
