قازاقستاندىق الپينيستەر ۋنيۆەرسيادا-2017 جالاۋىن وڭتۇستىك امەريكانىڭ ەڭ بيىك شىڭىنا تىگەدى - فوتو
بۇل تۋرالى بۇگىن الماتىدا وتكەن باسپا ءسوز ءماسليحاتى بارىسىندا بەلگىلى بولدى.
«اكونكاگۋا - وڭتۇستىك امەريكاداعى اند تاۋ سىلەمىنىڭ ەڭ بيىك شىڭى. بيىكتىگى - 6962 مەتر. بۇل ۇشار باسىنا شىعۋ وتە قولايسىز، اسا ءبىر اسۋ بەرمەس تاۋ ەمەس. ءبىراق، ونىڭ باسىندا سۇمدىق قاتتى داۋىل سوعىپ تۇرادى. ونىڭ جىلدامدىعى كەيدە ساعاتىنا 100 شاقىرىمعا دەيىن جەتەدى. ءبىراق، ءبىز ماعجان ەكەۋمىز ەشقانداي قيىندىققا قاراماستان، شىڭنىڭ باسىنا شىعىپ، قازاقستاننىڭ ۇلتتىق تۋىن جانە الماتىدا 2017 -جىلى وتەتىن بۇكىل الەمدىك قىسقى ۋنيۆەرسيادانىڭ جالاۋىن تىگەمىز. بۇل جەردە قازاقستاننىڭ تۋى بىرەۋ ەمەس، ەكەۋ بولادى. ەكەۋى دە بىردەي. ءبىراق، ولار جاي تۋلار ەمەس. ماعجان ءوز تۋىمەن ۆەلوسيپەد ارقىلى بۇكىل دۇنيە ءجۇزىن شارلاپ شىققان جيھانگەز. ال مەنىڭ تۋىم، دۇنيە ءجۇزى بويىنشا بيىكتىگى 8 مىڭ مەتردەن جوعارى بارلىق 14 شىڭدى قوسىمشا وتتەگىنسىز باعىندىرعان كەزىمدە وزىممەن بىرگە بولعان. ونى سول شىڭداردىڭ باسىنا تىككەم. سوندىقتان، بۇلار جاي تۋلار ەمەس. ەلدىڭ اتىن تۋ شىعارمايدى، سول تۋدى ۇستاعان تۇلعالار شىعاردى»، - دەدى م. جۇمايەۆ.
سونىمەن قاتار، ول بۇل ەكسپەديتسيانىڭ تەك قانا سپورتتىق سيپاتتاعى ساپار ەمەستىگىن، ونىڭ ۇلكەن ماعىناعا يە ەكەندىگىن جەتكىزدى.
«بۇل جاي ەكسپەديتسيا ەمەس، بۇل ناعىز رەاليتي-شوۋ بولايىن دەپ وتىر. ءبىز تۇڭعىش رەت الپينيزم سالاسىنا يننوۆاتسيالىق جوبا ەنگىزەيىن دەپ جاتىرمىز. ءبىز 24 ساعات بويى ونلاين رەجىمىندە بولامىز. ويتكەنى، ءبىز وزىمىزبەن بىرگە «ۆاي-فاي» تاراتاتىن سۋ-جاڭا جەرسەرىكتىك تەرمينالدار الىپ جۇرەمىز. ارنايى تەلەفون ارقىلى ۇنەمى بايلانىستا بولامىز. بىزگە قوڭىراۋ شالۋعا دا بولادى. سونداي-اق، قازاق جاعرافيالىق قوعامىنىڭ سايتىنا كىرىپ، ءبىزدىڭ ءدال قازىر قاي جەردە كەتىپ بارا جاتقانىمىزدى، قاي نۇكتەدە ەكەنىمىزدى ءبىلىپ وتىرۋعا بولادى. فەيسبۋك جانە ينستاگرام الەۋمەتتىك جەلىلەرىندە ءبىزدىڭ پاراقشامىز بولادى. ولارعا كۇنىنە بىرنەشە رەت كىرىپ، قىزىقتى اقپاراتتاردى، فوتوسۋرەتتەردى جاريالاپ وتىرامىز. كەيىن، شىڭ باسىنا شىققان ءساتىمىزدى جانە تۋ تىككەن ءساتىمىزدى بەينەكامەراعا ءتۇسىرىپ، ونى دا ونلاين جەلىسى ارقىلى تاراتقىمىز كەلەدى. ياعني، وسى جاڭا تەحنولوگيالاردىڭ ارقاسىندا ءبىز اكونكاگۋا شىڭىنا جالعىز نەمەسە ەكى ادام بولىپ ەمەس، بۇكىل قازاقستان حالقىمەن بىرلەسىپ شىعامىز»، - دەدى م. جۇمايەۆ.
ايتا كەتەلىك، ەكسپەديتسياعا قازاق جاعرافيالىق قوعامى، «Kaspi Bank» ا ق مەن «Beeline قازاقستان» كومپانياسى جان-جاقتى قولداۋ كورسەتىپ وتىر. ال قوس الپينيست وڭتۇستىك امەريكا قۇرلىعىنا ۇستىمىزدەگى جىلى 15- اقپاندا ۇشىپ كەتەدى. جالپى ەكسپەديتسيا مەرزىمى 3 اپتاعا شاقتالعان.
الپينيستەر ارگەنتينانىڭ مەندوسا قالاسىنا كەلگەننەن كەيىن، كەلەسى كۇنى 2700 مەتر بيىكتىكتە ورنالاسقان پەنيتەنتەس تاۋ- شاڭعىلى شيپاجايىنا كوتەرىلەدى. كەلەسى كۇنى ەكسپەديتسيا اكونكاگۋا ۇلتتىق ساياباعىنا كىرەدى. ەكسپەديتسيا سول جەردەن باستالادى. ۇلتتىق ساياباقتان كونفليۋەنسيا لاگەرىنە (3300 مەتر) دەيىن 3-4 ساعاتتىق جول بار. سول جەردە توپ جەرسىنۋ ءۇشىن ەكى كۇن تۇنەپ، 4100 مەتر بيىكتىككە كوتەرىلەدى. ول بيىكتىك - فرانسيا پلاسا دەپ اتالادى. كەلەسى كۇنى پلاتسا دە مۋلاس (4350 مەتر) بازالىق لاگەرىنە دەيىن 7-8 ساعاتتىق جول ءجۇرۋ قاجەت. شىڭعا شىعۋ كلاسسيكالىق سولتۇستىك- باتىس باعىتى بويىنشا جۇزەگە اسىرىلادى.
ءبىر كۇندىك دەمالىستان سوڭ 4900 مەتر (كانادا پلاساسى)، 5500 مەتر (نيدو دە كوندورەس) جانە 5900 مەترلىك (بەرلين) بيىكتىكتەردە لاگەر تىگىلەدى. ەكسپەديتسيانىڭ 12-14- كۇندەرى شىڭدى باعىندىرۋ جوسپارلانعان.
اۆتور: جاپپاربەرگەن ايبوتا
