قىتاي ەكسپو-2017 كورمەسىنە قاتىساتىنىن راستادى - فوتو

بەيجىڭ. قازاقپارات - قىتاي ەكسپو-2017 كورمەسىنە قاتىساتىنىن رەسمي راستادى. ءتيىستى قۇجاتتى تابىستاۋ ءراسىمى بۇگىن بەيجىڭدە ق ر سىرتقى ىستەر ءمينيسترىنىڭ ءبىرىنشى ورىنباسارى، ەكسپو-2017 كوميسسارى ءراپىل جوشىبايەۆ پەن قىتاي حالىقارالىق ساۋداعا ىقپالداسۋ كوميتەتىنىڭ ءتوراعاسى جياڭ زىڭۇيدىڭ قاتىسۋىمەن ءوتتى.

«قىتايدىڭ ىسكەرلىك ورتاسى ەكسپو-2017 گە ەرەكشە قىزىعۋشىلىعىن تانىتۋدا. وسى جىلعى مامىردا ق ح ر ءتوراعاسى شي جينپيننىڭ قازاقستانعا ساپارى ۋاقىتىندا پرەزيدەنت ن. نازاربايەۆقا ول قىتاي استانادا وتەتىن ەكسپو-2017 كورمەسىنە بەلسەندى قاتىساتىنىن ايتقان بولاتىن» ، - دەدى جياڭ زىڭۇي.

ونىڭ ايتۋىنشا، قىتاي ەكسپو-2017 ارقىلى الەمگە ءوزىنىڭ ەنەرگەتيكانى دامىتۋ تۇجىرىمداماسىن تانىستىرۋعا نيەتتى.

ءوز كەزەگىندە، ر. جوشىبايەۆ 2017 -جىلدى ق ر پرەزيدەنتى ن. نازاربايەۆ قىتايدىڭ قازاقستانداعى تۋريزم جىلى دەپ جاريالاعانىن ەسكە سالدى.

«بۇل ەكسپو-2017 كورمەسىن ويداعىداي، جەمىستى وتكىزۋگە ىقپال ەتەتىنىنە سەنىمدىمىن، ق ح ر ازاماتتارى ءبىزدىڭ ەل جايلى كوبىرەك بىلە تۇسەتىن بولادى» ، - دەدى ول.

قازاقستان ديپلوماتى قازاقستان قازىرگى ۋاقىتتا قىتاي ازاماتتارىنىڭ ق ر- نا تۋريستىك ساپارىن وڭايلاتۋ ماسەلەلەرىن پىسىقتاپ جاتقانىن، ونىڭ ىشىندە «استانا ەكسپو-2017» ۇلتتىق كومپانياسى اسپان استى ەلىنىڭ جەتەكشى تۋروپەراتورلارىمەن ەكى كەلىسىمگە قول قوياتىنىن مالىمدەدى.

ەسكە سالساق، قىتاي ەكسپو-2017 گە ءوزىنىڭ قاتىساتىنىن راستاعان 39 ەل بولدى.