ليتۆا «ەكسپو-2017» كورمەسىنە قاتىسۋعا دايىن - الگيرداس بۋتكيەۆيچيۋس
بۇل تۋرالى بۇگىن ەلوردادا قازاقستان مەن ليتۆا ۇكىمەتى اراسىنداعى ءبىرقاتار كەلىسىمدەرگە قول قويىلعاننان كەيىنگى بريفينگتە ليتۆا رەسپۋبليكاسىنىڭ پرەمەر-ءمينيسترى الگيرداس بۋتكيەۆيچيۋس ايتتى.
«ليتۆا دەلەگاتسياسىنىڭ قازاقستانعا ساپارى بارىسىندا ەكى بيزنەس-فورۋم وتەدى. ءبىرى بۇگىن استانادا، ال ەكىنشىسى الماتىدا ۇيىمداستىرىلادى. وسى رەتتە قازاقستان ۇكىمەتىنە جانە پرەمەر-مينيستر كارىم ماسىموۆكە اتالعان ءىس-شارالاردى جوعارى دەڭگەيدە ۇيىمداستىرۋعا قول ۇشىن بەرگەنى ءۇشىن زور ريزاشىلىعىمدى بىلدىرەمىن»، - دەدى ول.
ول ءوز سوزىندە قۇپيا اقپاراتتى ءوزارا قورعاۋ، قىلمىستىق جولمەن الىنعان كىرىستەردى زاڭداستىرۋعا جانە لاڭكەستىكتى قارجىلاندىرۋعا قارسى ارەكەتتەر سالاسىندا ءوزارا ءىس-قيمىل، سونىمەن بىرگە ازىق-تۇلىك جانە ۆەتەريناريا قىزمەتىندەگى ىنتىماقتاستىق تۋرالى ءۇش كەلىسىمگە قول قويىلعانىن اتاپ ءوتتى.
«سوڭعى جىلدارى قازاقستان مەن ليتۆا اراسىندا ەكىجاقتى قارىم-قاتىناس سالاسىنداعى ورتاق مۇددەلەستىك جاندانىپ كەلە جاتىر. مەن كولىك، ساۋدا، بايلانىس، اعارتۋ، مەديتسينا سالالارىنداعى ىنتىماقتاستى ەرەكشە اتاپ وتكىم كەلەدى. دەگەنمەن، بۇل ءبىزدىڭ ىنتىماقتاستىق الەۋەتىمىزدىڭ شاعىن بولىگى عانا. ليتۆا استانادا وتەتىن «ەكسپو-2017» كورمەسىن قاتىسۋعا دايىن»، - دەدى الگيرداس بۋتكيەۆيچيۋس.
اۆتور: مارلان جيەمباي
