الماتىدا 2017-جىلعى قىسقى ۋنيۆەرسيادا ويىندارى ءۇشىن جاڭا بۋ قازاندىعى سالىنىپ جاتىر

الماتى. قازاقپارات - الماتىدا 2017-جىلى بولاتىن قىسقى ۋنيۆەرسيادا ويىندارىنىڭ نىساندارى ءۇشىن ەكىنشى جىلۋ ەلەكتر ورتالىعىندا (2-ج ە و) جاڭا بۋ قازاندىعى سالىنىپ جاتىر.

بۇل تۋرالى كەشە الماتىدا ب ا ق وكىلدەرى ءۇشىن قالاداعى ەنەرگيا كەشەندەرى بويىنشا جاسالعان كوشپەلى جيىن بارىسىندا الماتىنىڭ ەكىنشى جىلۋ ەلەكتر ورتالىعىنىڭ (الماتى 2-ج ە و) باسقارۋشى ديرەكتورى بەيسەمبەك سابىرقۇلوۆ ءمالىم ەتتى.

ونىڭ ايتۋىنشا، بۇل جوباعا رەسپۋبليكالىق بيۋجەتتەن 25 ميلليارد تەڭگە بولىنگەن.

«الماتىدا ەكىنشى جىلۋ ەلەكتر ورتالىعىندا جاڭا بۋ قازاندىعى سالىنىپ جاتىر. ونىڭ قۇرىلىسى 2016-جىلدىڭ باسىندا اياقتالىپ، اقپان ايىندا قازاندىق ىسكە قوسىلادى دەپ جوسپارلاپ وتىرمىز. بۇل قازان اگرەگاتى ساعاتىنا 420 توننا بۋ وندىرە الادى. وسى قازاندىقتىڭ ارقاسىندا ۋنيۆەرسيادا ويىندارى وتەتىن بارلىق نىساندار جىلۋمەن جانە ەلەكتر ەنەرگياسىمەن تولىقتاي قامتاماسىز ەتىلەدى. بۇل جەردە جىلىنا قوسىمشا 450 ميلليون كۆتس ەلەكتر ەنەرگياسى وندىرىلەدى» - دەدى ب. سابىرقۇلوۆ.

ايتا كەتەلىك، الماتى 2-ج ە و قازاقستانداعى ەڭ ءىرى جىلۋ ەلەكتر ورتالىعى بولىپ تابىلادى. بيىل ونىڭ ىرگەتاسىنىڭ قالانعانىنا 40 جىل تولىپ وتىر. سەيسميكالىق قاۋىپسىزدىكتى ارتتىرۋ ماقساتىندا ستانسا 12 مەتر تەرەڭدىكتە ورنالاسقان. جاڭا بۋ قازانى ىسكە قوسىلعان سوڭ، ورتالىقتا ءارقايسىسىنىڭ قۋاتى 420 تونن/ساع. 8 بۋ قازانى جۇمىس ىستەيتىن بولادى.

اۆتور: جاپپاربەرگەن ايبوتا