ەكسپو-2017 كورمە كەشەنىن سالۋ ارقىلى استانانىڭ كەلبەتى دە وزگەرەدى، ەل ەكونوميكاسى وڭ سەرپىن الادى - ن. نازاربايەۆ
كەزدەسۋ بارىسىندا ت. ەرمەگيايەۆ ەكسپو-2017 كورمەسىنە دايىندىق پەن كورمە كەشەنى قۇرىلىسىنىڭ بارىسى تۋرالى باياندادى.
قازاقستان پرەزيدەنتى ۇلتتىق كومپانيانىڭ الدىنا ۇلكەن مىندەت قويىلعانىن، ونى بۇكىل جۇرتشىلىق باقىلاپ وتىرعانىن ايتتى.
- دايىندىق شارالارى بەكىتىلگەن كەستەگە سايكەس جۇرگىزىلۋى ءتيىس. كورمە كەشەنىن سالۋ ارقىلى استانانىڭ كەلبەتى دە وزگەرەدى، ەل ەكونوميكاسى وڭ سەرپىن الادى. قۇرىلىسقا قاجەتتى ماتەريالدار شىعارۋمەن اينالىساتىن شاعىن جانە ورتا بيزنەس سۋبەكتىلەرىن جۇمىسپەن قامتىعان ءجون. تاعى ءبىر ماڭىزدى ماسەلە - كورمە نىساندارىن كورمە وتكەننەن كەيىن پايدالانۋ، ولار كورمەدەن كەيىن دە پايدالانىستا بولۋى كەرەك، - دەدى نۇرسۇلتان نازاربايەۆ.
«استانا ەكسپو-2017» ۇلتتىق كومپانياسى» ا ق باسقارما ءتوراعاسى ءوز كەزەگىندە كورمە نىساندارىنىڭ قۇرىلىسى قۇرىلىس-مونتاج جۇمىستارىنىڭ بەكىتىلگەن كەستەسىنە سايكەس ءجۇرىپ جاتقانىن ايتتى.
- جىل اياعىنا دەيىن وبلىس اكىمدىكتەرىمەن ءبىرقاتار مەموراندۋم جاساۋ جوسپارلانىپ وتىر. وندا قۇرىلىسقا قاجەتتى ماتەريالدار پىسىقتالادى. بۇگىننىڭ وزىندە قۇرىلىس ماتەريالدارى جەرگىلىكتى كومپانيالاردان ساتىپ الىنۋدا، - دەدى ت. ەرمەگيايەۆ.
ول سونداي-اق كومپانيا قارجىلاندىرۋدىڭ بالاما كوزدەرىن تارتۋ تەتىكتەرىن ازىرلەگەنىن ايتتى. «استانا ەكسپو-2017» ۇلتتىق كومپانياسى» ا ق باسقارما باسشىسىنىڭ اقپاراتىنا قاراعاندا، قوناق ۇيلەر، تۇرعىن ۇيلەر مەن وزگە دە نىسانداردى قوسا قامتىعاندا، تىكەلەي شەتەلدىك ينۆەستيتسيالاردىڭ بولجامدى كولەمى 800 ميلليون دوللار بولادى.
كەزدەسۋدىڭ قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.
بەكىتىلگەن جوسپارعا سايكەس، ەكسپو-2017 بارلىق 38 نىسانىن پايدالانۋعا بەرۋ 2016-جىلدىڭ جەلتوقسانىنا جوسپارلانىپ وتىر. كورمەنىڭ حالىقارالىق قاتىسۋشىلارى ءوز ەكسپوزيتسيالارىن دايىنداۋ جۇمىستارىن 2017-جىلدىڭ قاڭتارىندا باستايدى.
2017-جىلدىڭ 10- ماۋسىمىنان 10- قىركۇيەگىنە دەيىن سوزىلاتىن ەكسپو-2017 كورمەسىنە 100 دەن اسا ەل، وننان كەم ەمەس حالىقارالىق ۇيىمدار، يننوۆاتسيالىق تەحنولوگيالاردىڭ 10 شاقتى كوشباسشى-كومپانيالارى قاتىسادى دەپ جوسپارلانۋدا. كورمەنى 2 ميلليوننان استام ادامنىڭ كەلىپ كورۋى كۇتىلۋدە، سونىڭ شامامەن 85 پايىزى قازاقستاندىقتار بولماق.
