قىتايداعى التىن ءوندىرىسى 2017 - جىلى بىردەن 9 پايىزعا تومەندەگەن

استانا. قازاقپارات - الەمدەگى ەڭ ءىرى التىن ءوندىرۋشى ەل قىتايدىڭ التىن ءوندىرىسى وتكەن جىلى 9 پايىزعا ازايدى. قىتايدا التىن ءوندىرۋ 1980 -جىلدان بەرى نەبارى ەكىنشى رەت تومەندەپ وتىر، دەپ حابارلايدى Financial Times.

دۇنيەجۇزىلىك التىن كەڭەسىنىڭ (World Gold Council) مالىمەتتەرى بويىنشا، 2008 -جىلدان بەرى الەمدىك التىن قورى جىل سايىن ارتىپ كەلگەن ەدى. الايدا، وتكەن جىلى بۇل ءوسىم توقتاپ قالدى.

الەمدەگى التىن ءوندىرىسىنىڭ شامامەن 15 پايىزى قىتايدىڭ ۇلەسىندە. بۇل پروپورتسيا، مىسالى ساۋد ارابياسىنىڭ مۇناي نارىعىنداعى ۇلەسىنە قاراعاندا دا جوعارى.

الايدا، 2016 -جىلدان باستاپ، قىتايلىق بيلىك التىن ءوندىرۋ سالاسىنا شەكتەۋ ەنگىزىپ، ءبىرقاتار شاعىن التىن كەنىشتەرىن جاۋىپ تاستادى.

دۇنيەجۇزىلىك التىن كەڭەسىنىڭ ماركەتينگتىك بارلاۋ ءبولىمىنىڭ باستىعى اليستەر حيۋيتتىڭ ايتۋى بويىنشا، قىتايلىق بيلىك ەكولوگيالىق ماسەلەلەرگە كوبىرەك نازار اۋدارا باستاعان. «التىن ءوندىرىسى قاتاڭ رەتتەلۋدە»، - دەدى ول.

دۇنيەجۇزىلىك التىن كەڭەسىنىڭ مالىمەتتەرى بويىنشا، وتكەن جىلعى قىتايدىڭ التىن ءوندىرىسى 420,5 توننانى قۇراعان. قىتايدا التىنعا دەگەن سۇرانىس سول كەزەڭدە 4 پايىزعا ارتىپ، 953,3 تونناعا جەتكەن.

2017 -جىلى الەمدىك التىن ءوندىرىسى 3268,7 تونناعا دەيىن ءوستى. 2016 -جىلعى بۇل كورسەتكىش 3263 توننا بولاتىن. بۇل 2008 -جىلدان بەرى ەڭ از ءوسىم. سوڭعى رەت 2008 - جىلعى قارجى داعدارىسى كەزىندە التىن ءوندىرىسى 2  پايىزعا تومەندەگەن ەدى.

2017 -جىلدىڭ باسىنان التىننىڭ باعاسى 15 پايىزعا ءوستى، 1 ۋنتسيا التىن باعاسى -  1334,78 دوللار.

قىتايدىڭ التىنى نەگىزىنەن ىشكى سۇرانىستى قاناعاتتاندىرۋ ءۇشىن پايدالانىلادى، ويتكەنى قىتاي بيلىگى كومپانيالارعا التىندى ەكسپورتتاۋعا رۇقسات بەرمەيدى.

قىتايداعى زاڭناما قاتايتىلعان سوڭ بۇل ەلدىڭ التىن ءوندىرۋشى كومپانيالارى شەتەلدەگى كەنىشتەردى ساتىپ الۋعا كوبىرەك كوڭىل بولە باستادى.

اۆتور: مۇحتار مۇرات