ەكسپو-2017: ەڭ بەلسەندى 20 ەرىكتىگە استانا اكىمىنىڭ گرانتى بەرىلەدى
بۇل تۋرالى استانا قالاسى اكىمدىگى جاستار ساياساتى ماسەلەلەرى باسقارماسىنىڭ باسشىسى اسحات ورالوۆ ءمالىم ەتتى.
«ەڭ بەلسەندى جانە ەڭ ۇزدىك ەرىكتىلەرگە قالا اكىمىنىڭ ءبىر جىلدىق وقۋ گرانتى بەرىلەدى. جەڭىمپازداردى سۋپەرۆايزەرلەر (ەرىكتىلەردىڭ ۇيلەستىرۋشىلەرى) انىقتايدى. ودان بولەك، ەرىكتىلەر العىس حاتتار، سىيلىقتار مەن جۇلدەلەر الادى. سونداي-اق، ەرىكتىلەردىڭ ارنايى فورماسى ازىرلەندى، وندا ءۇش جەيدە، بەيسبولكا، كۇرتە، ريۋكزاك جانە تەرموس بار»، - دەپ حابارلادى ول.
باسقارما باسشىسىنىڭ ايتۋىنشا، ەرىكتىلەر كورمەگە ارنايى دايىندىقتان وتكەن. «بارلىق 1500 ەرىكتى «نيكا» وقىتۋ ورتالىعىندا ارنايى ترەنەرلەردەن ءتالىم الدى. وندا قالا تاريحى، استانانىڭ كورىكتى ورىندارى، ەكسپو تاريحىن وقىپ، شەتەلدىك قوناقتارمەن كەلىسسوزدەر جۇرگىزۋدىڭ قىر-سىرىن مەڭگەردى. وقىتۋ اياقتالعان سوڭ بارشا ەرىكتىگە ارنايى سەرتيفيكاتتار بەرىلدى»، - دەدى ورالوۆ.
ەرىكتىلەردىڭ جەمىستى جۇمىس ىستەۋى ءۇشىن قالا اكىمدىگى بارلىق قولايلى جاعدايدى جاسادى: ءبىر اۋىسىمدا 500 ەرىكتى قالاعا شىعادى، ولار ل. ن. گۋميليەۆ اتىنداعى ە ۇ ۋ ستۋدەنتتەر ۇيىنە تەگىن ورنالاستىرىلادى جانە بارلىعى ىستىق تاماقپەن، تەگىن اۆتوبۋس بيلەتتەرىمەن قامتاماسىز ەتىلەدى.
ودان بولەك، ەرىكتىلەر بوس ۋاقىتىندا قالادا وتەتىن نەگىزگى كونسەرتتەر مەن ءىس-شارالارعا تەگىن كىرە الادى جانە ەرىكتىلەر ءۇشىن وتاندىق جۇلدىزدارمەن بەيرەسمي كەزدەسۋ، مۋزىكالىق كەشتەر ۇيىمداستىرىلادى.
اۆتور: ايجان سەرىكجان قىزى
