الماتىدا 2017-جىلعى ۋنيۆەرسيادانىڭ ورتالىق نىسانى - 12 مىڭ ورىندىق مۇز سارايىنىڭ قۇرىلىسى اياقتالدى - فوتو
بۇل تۋرالى 2017-جىلعى قىسقى ۋنيۆەرسيادانىڭ باسپا ءسوز قىزمەتى حابارلادى.
ايتا كەتۋ كەرەك، اتالعان سپورتتىق نىسان بيۋدجەت قارجىسى 32 ميللياردتان 17 ميللياردتقا قىسقارعانىنا قاراماستان، مەرزىمىنەن بۇرىن، 3 اي ەرتە پايدالانۋعا بەرىلىپ وتىر. قازىر رەتتەۋ جۇمىستارى عانا جۇرگىزىلۋدە. قۇرىلىس كەزىندە قازقامتۋدىڭ ۇلەسى %60 قۇراعان. بۇل تۋرالى الماتى قالاسىنىڭ اكىمىنە جۇمىس ساپارى بارىسىندا حابارلاندى.
سپورت نىسانىندا كوگالداندىرۋ مەن اباتتاندىرۋ جۇمىستارىنىڭ نەگىزگى كەزەڭى اياقتالعان. مۇز سارايىنا كىرە بەرىستەگى الاڭدا اعاشتار وتىرعىزىلىپ، گۇلدەر ەگىلىپ، جاسىل جەلەك توسەلگەن. ىرگەلەس اۋماق، شاھاردىڭ ءبىرىڭعاي جوباسى بويىنشا ۇلتتىق ناقىشتا كومكەرىلگەن. ماسەلەن، شاعىن ساۋلەت فورمالارى، قوقىس جاشىكتەرى، ورىندىقتار ەتنيكالىق ويۋ-ورنەكتەرمەن بەزەندىرىلگەن.
ەستەرىڭىزگە سالا كەتەيىك، وسى جىلدىڭ اقپان ايىندا مەملەكەت باسشىسى ن. ءا. نازاربايەۆ ۋنيۆەرسيادا بويىنشا كەزدەسۋ وتكىزىپ، ءىرى سپورتتىق شارانى وتكىزۋ، قالانىڭ دامۋىنا جاڭا سەرپىن بەرىپ، ساۋلەت كەلبەتى، قوناق ءۇي، مەيرامحانا، قوعامدىق كولىك پەن سپورتتىق نىساندارداعى قىزمەت تۇرلەرىن جاقسارتاتىنىن ايتقان. سونداي-اق، سپورتتىق نىسانداردىڭ بارلىعى حالىققا قولجەتىمدى بولۋى كەرەكتىگىنە نازار اۋدارعان.
ماسەلەن، 12 مىڭ ورىندىق مۇز سارايى، امبەباپ مۇز ايدىنى مەن كورەرمەندەرگە ارنالعان ورىندارى بار سپورتتىق كەشەن بولىپ تابىلادى. بۇل جەردە شايبالى حوككەي، مانەرلەپ سىرعاناۋ، شورت-ترەكتەن وقۋ-جاتتىعۋ جۇمىستارىن وتكىزۋگە بولادى. جانە دە مادەني شارالاردى، حالىقتىڭ مۇز ايدىنىندا بۇقارالىق سىرعاناۋىن ۇيىمداستىرعا بولادى. كەشەن ءۇش بلوكتان تۇرادى؛ «ا» بلوكى - امبەباپ 12 مىڭدىق مۇز ايدىنى، «ب» بلوكى - ساۋىقتىرۋ كەشەنى بار جاتتىعۋ ايدىنى جانە «ۆ» بلوكى - ءجۇزۋ باسسەينى.
بۇدان بولەك، قالا باسشىسىنا ۋنيۆەرسيادا نىساندارىنىڭ بارلىعى ۋاقىتىسىندا پايدالانۋعا بەرىلەتىنى حابارلاندى. قازىرگى ۋاقىتتا الاتاۋ اۋدانىندا ورنالاسقان 5 مىڭ ورىندىق اتلەتتەر قالاشىعى مەن مەدەۋ اۋدانىنداعى 3 مىڭدىق مۇز ارەناسىنىڭ قۇرىلىستارى قارقىندى جۇرگىزىلۋدە.
ەسكە سالا كەتسەك، الماتى قالاسىنداعى حالىقارالىق قىسقى ستۋدەنتتەر ويىنى 2017-جىلدىڭ 29- قاڭتارى مەن 8- اقپان ارالىعىندا وتەدى. وعان 60 تان استام ەلدەن 2000 سپورتشى كەلەدى دەپ جوسپارلانعان. جارىسقا 3 مىڭ ەرىكتى جۇمىلدىرىلماق. سايىستار، 8 سپورتتىق نىساندا، 12 سپورت تۇرىنەن وتەدى.
