07:29, 17 - تامىز 2016 | GMT +5
ريو-2016: جاينا شەكەربەكوۆا جارتىلاي فينالعا وتە الماي قالدى - فوتو
ريو- دە- جانەيرو. قازاقپارات - بۇگىن ريو- دە- جانەيرو قالاسىندا ءوتىپ جاتقان جازعى وليمپيادا ويىندارىندا بوكستان ايەلدەر اراسىنداعى 51 كەلى سالماقتا ونەر كورسەتكەن قىزىمىز جاينا شەكەربەكوۆا جارتىلاي فينالعا وتە الماي قالدى،

دەپ حابارلايدى ريوداعى قازاقپارات ءتىلشىسى.
قازاقستان چەمپيونى (2013,2014)، ازيا بىرىنشىلىگىنىڭ جەڭىمپازى (2010)، ازيا ويىندارىنىڭ (2014) كۇمىس جۇلدە يەگەرى جاينا شەكەربەكوۆا وليمپيادا ويىندارىنداعى جارىسىن بىردەن شيرەك فينالدان باستاپ، العاشقى جەكپە- جەگىندە فرانسيالىق بوكسشى، الەم چەمپيوناتىنىڭ ۆيتسە- چەمپيونى سارا ۋرامۋننان ۇتىلدى. فرانسيالىق سارا ۋرامۋن 1/8 فينالدا ماروككو بوكسشىسى زوحرۋ ەز- ءزاحراۋيدى ايقىن باسىمدىقپەن ۇتقان ەدى. مىنە، بۇگىن قازاق قىزىن ۇتىپ، جارتىلاي فينالعا جولداما الدى.
ەستەرىڭىزگە سالا كەتەيىك، وسىدان بىرەر كۇن بۇرىن 75 كەلىدەگى ارۋىمىز داريعا شاكىموۆا شارشى الاڭعا شىعىپ، كانادالىق قارسىلاسى ا. فورتينمەنى 2:1 ەسەبىمەن ۇتىپ، كەلەسى اينالىمعا جولداما العان بولاتىن.
Суреттерді түсірген - Данияр Майлыбаев.