ريو-2016: ولگا رىپاكوۆا قازاقستان قورجىنىنا ءتورتىنشى قولا مەدال سالدى

دەپ حابارلايدى ريوداعى قازاقپارات ءتىلشىسى.
ءۇش قارعىپ سەكىرۋ سايىسىنان باس جۇلدەنى كولۋمبيالىق سپورتشى 15.17 مەترلىك ناتيجەمەن يەلەندى. ەكىنشى ورىنعا 14.98 م ناتيجەمەن ۆەنەسۋەلالىق سپورتشى شىقتى. ال لوندون وليمپياداسىنىڭ چەمپيونى قازاقستاندىق سپورتشى ولگا رىپاكوۆا 14. 74 م كورسەتكىشپەن ءۇشىنشى ورىنعا تۇراقتاپ، قازاقستان قورجىنىنا ءتورتىنشى قولا مەدالدى سالدى. بۇل قازاق سپورتشىلارىنىڭ ريوداعى ءۇش كۇن ۇزىلىستەن كەيىنگى قول جەتكىزگەن جۇلدەسى.
ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونسەتسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن.
وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچيەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى سپورتشىمىز - اۋىر اتلەت نيجات راحيموۆ جانە 200 مەتر قاشىقتىققا جۇزۋدەن دميتريي بالاندين ەكەۋى التىن جەڭىپ الدى.
ال وسى كۇنى ايەلدەر اراسىندا سىنعا تۇسكەن اۋىر اتلەت قازاقتىڭ قىزى جازيرا جاپپارقۇل كۇمىس جۇلدەگەر اتانعان ەدى.
مىنە، بۇگىن قازاقستان قورجىنىنداعى مەدالدار سانىن ولگا رىپاكوۆا تاعى ءبىر مەدالمەن ياعني، سەگىزىنشى جۇلدەمەن تولىقتىردى.
وسىلايشا قازاقستان ريو- دە- جانەيرو قالاسىندا ءوتىپ جاتقان وليمپيادا ويىندارىندا جالپى ەسەپتە 2 التىن، 2 كۇمىس، 4 قولا مەدالمەن 16-ورىنىن ساقتاپ قالدى.
اۆتور: كۇنسۇلتان وتارباي