ريو-2016: وليمپيادانىڭ التىنشى كۇنى مەدال بۇيىرمادى

وليمپيادانىڭ التىنشى كۇنى قازاق سپورتشىلارى ءۇشىن ءساتسىز بولدى دەۋدەن اۋلاقپىز. الايدا، اتتەگەن- اي دەگەن وكىنىشتەر دە بولدى.
بۇگىن ريو تاڭى قىلاڭ بەرە قازاقستاندىق سپورت جانكۇيەرلەرى دزيۋدوشى ماكسيم راكوۆتىڭ ونەرىن تاماشالاۋعا اسىقتى.
بۇل بالۋانىمىزدان ءۇمىت كۇتكەندەر كوپ ەدى. قالايدا ۇزدىك ۇشتىكتەن كورىنەدى دەپ سەندى. ول العاشقى كەزدەسۋىندە ەستونيالىق گريگوري ميناشكيندى جەڭگەن دە جەڭىسكە دەگەن سەنىمدەرى ەسەلەنە تۇسكەنى انىق.
وكىنىشكە قاراي، 1/8 فينالدا چەحيالىق لۋكاش كرپالەكتەن جەڭىلىپ قالادى دەپ ەشكىم ويلاعان جوق. وسى قارسىلاسىن ۇتسا، ارى قاراي مەدالعا ءبىر تابان جاقىندايمىز دەپ ىشتەي جورامالدار جاسادىق.
قوس بالۋان ارى- بەرى كوپ ايقاستى. ءبىر- ءبىرىن ايقىن باسىمدىلىقپەن ۇتا المادى. سول سەبەپتى مىقتىنى تورەشىنىڭ ەسكەرتۋى انىقتادى. ول قازاقستاندىق بالۋانعا سىلبىر كۇرەستى دەپ ءبىر ەسكەرتۋ جاسادى. وسى ەسكەرتۋ ماكسيم راكوۆتى ريو وليمپياداسىن اياقتاۋىنا اكەلىپ سوقتى.
سونىمەن قازاقستاننان ريو وليمپياداسىنا 6 سپورتشى ەل نامىسىن ارقالاپ كەلگەن بولاتىن. بۇگىن راكوۆ التىنشى بولىپ، جارىسقا شىعىپ، دزيۋدوشىلارىمىز ريو وليمپياداسىن اياقتادى. سپورتتىڭ بۇل تۇرىنەن 6 سپورتشى ءبىر كۇمىس، ءبىر قولا جەڭىپ الدى. جالپى بۇل ءبىر سپورت تۇرىنەن الىپ قاراعاندا جامان كورسەتكىش ەمەس.
سونىمەن قاتار، بۇگىن ريودا ءتورت بىردەي بوكسشىمىز شارشى الاڭعا كوتەرىلدى. تورتەۋىنىڭ ۇشەۋى قارسىلاستارىن ايقىن باسىمدىقپەن ۇتىپ، كەلەسى كەزەڭگە جولداما الدى. ال ءبىر بوكسشىمىز قارسىلاسىنان ۇتىلىپ، جانكۇيەرلەر قاتارىنا قوسىلدى.
بۇگىنگى جارىستى بوكسشىلاردان ءبىرىنشى بولىپ، 56 كەلى سالماقتا ونەر كورسەتەتىن قايرات ەراليەۆ ازەربايجاندىق دجاۆيد چەلەبيەۆتان ايلاسىن اسىردى. ەسەپ - 3:0.
ەكىنشى شارشى الاڭعا كوتەرىلگەن 64 كەلىدەگى بوكسشىمىز ابىلايحان ءجۇسىپوۆ بريتانيالىق پات ماككورماكتان جەڭىلدى.
ءۇشىنشى بوكسشىمىز 69 كەلىگە دەيىن سالماقتا جەكپە- جەككە شىققان ۇلتتىق قۇراما كاپيتانى دانيار ەلەۋسىنوۆ ۇلى بريتانيالىق دجوش كەلليدى ۇتىپ، شيرەك فينالعا جولداما الدى.
قازاقستاندىقتار ءۇشىن بۇگىنگى بوكس كەشىنىڭ شىمىلدىعىن لوندون وليمپياداسىنىڭ كۇمىس جۇلدەگەرى ادىلبەك نيازىمبەتوۆ جاپتى. ول 1/8 فينالدا بەلارۋس بوكسشىسى ميحايل دولگوليەۆەتستان ايلاسىن اسىرا ءبىلدى.
سونىمەن مىرزاعالي ايتجانوۆ باپتاپ الىپ كەلگەن 10 بوكسشىنىڭ ۇشەۋى جارىستارىن اياقتادى. ەندى جەتى بوكسشى ريو وليمپياداسىنداعى جەمىستى جولدارىن ارى قاراي جالعاستىرادى.
سونداي- اق، بۇگىن ريو- دە- جانەيرودا ءوتىپ جاتقان وليمپيادا ويىندارىندا 50 مەتردەن پنيەۆماتيكالىق ۆينتوۆكادان وق اتۋ سايىسىندا سىنعا تۇسكەن ەليزاۆەتا كورول فينالعا وتەتىن قاجەتتى ۇپايدى جيناي المادى. ول ىرىكتەۋ كەزەڭىندە 575 ۇپاي جيناپ، 24- ورىنعا تابان تىرەدى.
سونىمەن قازاقستان قۇراماسى بۇگىن جالپى كوماندالىق ەسەپتە كەشەگى ورىننان ءبىر ساتىعا تومەن سىرعىپ، 12-ورىندا تۇر.
اۆتور: كۇنسۇلتان وتارباي