قازاقستاننىڭ مەرگەندەرى مەن ارتيللەرياشىلارى ارميا ويىندارى-2016 بايقاۋىندا ءبىرىنشى ورىن الدى - فوتو

رەسەيدىڭ اسكەري قىزمەتشىلەرى ەكىنشى ورىنعا تابان تىرەسە، ءۇشىنشى ورىن بەلارۋستىق اتقىشتاعا بۇيىردى. مەرگەندەر بايقاۋىنىڭ اقتىق كەزەڭىنە ءتۋرنيردىڭ ءبىرىنشى جانە ەكىنشى كەزەڭدەرىنىڭ قورىتىندىسى بويىنشا ءتورت ۇزدىك كوماندا، ياعني، قازاقستان، رەسەي، قىتاي مەن بەلارۋستىڭ كوماندالارى وتكەنىن ەستەرىڭىزگە سالا كەتەيىك.
ويىننىڭ بارلىق كەزەڭىندە بايقاۋدىڭ بارشا قاتىسۋشىلارى جوعارى شەبەرلىك دەڭگەيىن، دەنە توزىمدىلىگى مەن دالدىكتى پاش ەتتى. قاتىسۋشىلارعا بايقاۋدىڭ ءۇش كەزەڭىنەن وتۋگە تۋرا كەلدى. ەكىنشى كەزەڭنىڭ جارقىن ساتتەرىنىڭ ءبىرى «ارنايى وق اتۋ» سايىسى بولدى. قاتىسۋشىلارعا 150-200 مەتر قاشىقتىقتا جويۋدىڭ ازايتىلاتىن ايماعىمەن تۇتقىنى بار «شارتتى» لاڭكەستىڭ باسىن ەلەستەتەتىن بەس نىسانانى جويۋ قاجەت بولدى.
ال سايىستىڭ ەڭ كوزتارتارلىق ءساتى جارىستىڭ ءۇشىنشى كەزەڭى بولدى. بۇل سايىس 1 شاقىرىمدىق قاشىقتىقتى قامتىدى. وندا مەرگەندەرگە قابىرعاداعى ويىلعان جەردى، بيىكتىگى 2 مەتر قاقپانى، وردى، سىمدى قورشاۋداعى ءوتۋدى ەڭسەرۋگە، ماكاروۆ تاپانشاسىنان وق اتۋعا، دراگۋنوۆتىڭ مەرگەن ۆينتوۆكاسىنان 300 مەتر قاشىقتىقتا كەۋدە فيگۋرالارىنا ءدوپ تيگىزۋگە، رگد-5 وقۋ گراناتالارىن لاقتىرۋعا، ديناميكالىق دۋالدان، اۆتوموبيل دوڭگەلەكتەرىنەن جاسالعان ءۇيىندى مەن كولبەۋلى باسپالداقتان وتۋگە تۋرا كەلدى. بارلىق جاتتىعۋلار سەرىكتەستەر اراسىنداعى جىلدامدىق، ءوزارا تۇسىنىستىك پەن ناقتى ۇيلەسىمدى ءوزارا ءىس- قيمىل جاساۋعا ەسەپتەلىنگەن. ءۇشىنشى كەزەڭدە قازاقستاندىق مەرگەندەر كومانداسى ەڭ ۇزدىك ناتيجە - 18 مينۋت 18 سەكۋندتى كورسەتتى. قىتايدىڭ كومانداسى ەستافەتانى 18 مينۋت 58 سەكۋند ناتيجەسىمەن اياقتادى. رەسەيلىك كوماندا 20 مينۋت جانە بەلورۋسسيانىڭ كومانداسى 21 مينۋت 03 سەكۋند ناتيجەسىمەن مارەگە جەتكەنىن ايتا كەتكەن ءجون.
قارسىلاستاردىڭ بارلىعى مىقتى بولدى. الايدا، ەڭ مىقتى، ارينە، قازاقستاننىڭ كومانداسى جەڭىسكە جەتتى. ءبىز بۇعان دايىندالدىق، جەڭىس تۇعىرىنان كورىنۋگە تالپىندىق. ءبىز ءوزىمىزدى ءىس جۇزىندە كورسەتە بىلدىك جانە قورعانىس ءمينيسترى قويعان تاپسىرمانى ورىندادىق دەپ ەسەپتەيمىز. وسىنداي باسەكەلى تارتىستاردىڭ جىل سايىن وتكىزىلۋىن قالار ەدىك. بۇل بارلىق بولىمشەلەر، كۇللى ەل ءۇشىن وتە جاقسى تاجىريبە»، - دەدى شەشۋشى سايىستىڭ قاتىسۋشىسى، قازاقستاندىق مەرگەن 3-سىنىپتى سەرجانت دميتري وحوتنيكوۆ.
ودان باسقا، وتاردا «ارتيللەريالىق وق اتۋ شەبەرلەرى» حالىقارالىق بايقاۋىنىڭ بارلىق ءۇش كەزەڭىنىڭ قورىتىندىسى شىعارىلدى. قازاقستاننىڭ ارتيللەرياشىلار كومانداسى «ارتيللەريالىق وق اتۋ شەبەرلەرى» بايقاۋىنىڭ بارلىق ءۇش كەزەڭىنىڭ قورىتىندىسى بويىنشا ءبىرىنشى ورىنعا شىقتى. بارلىق قاتىسۋشىلار جوعارى شەبەرلىك دەڭگەيىن، دەنە توزىمدىلىگى مەن دالدىكتى پاش ەتتى. قاتىسۋشىلارعا «جەكە جارىس»، «تۇنگى سپرينت»، «ەستافەتا» جانە «ەستافەتا. مارە» بايقاۋلارىنىڭ ءتورت كەزەڭىن ەڭسەرۋگە تۋرا كەلدى. بارلىق كەزەڭ بويى قاتىسۋشىلار وقشاشاردان، مينا اتقىشتان، گراناتا اتقىشتان، اۆتوماتتان دالدىككە وق اتۋ جانە «يرەلەڭ»، «مينا- جارىلعىش قورشاۋداعى سوراپ وتكەل»، «تومپەشىك» جانە «سوراپ كوپىردىڭ سۇلباسى» كەدەرگىلەرى بار تاس جولداردى ءوتۋ شاپشاڭدىلىعىنا باق سىناستى. سونداي- اق، قاتىسۋشى مينا اتقىشتاردىڭ ەسەپتوپتارى تۇنگى جاعدايلاردا نىسانالارعا ءدوپ تيگىزۋدەن تارتىسقا ءتۇستى. اسكەري قىزمەتشىلەر 2ب11 مينااتقىشىنان، رپگ-7ۆ- دان، تۇنگى كوزدەۋىشتەرى بار اك-74 اۆتوماتىنان وق جاۋدىردى. مينااتقىشتان وق اتۋ راديۋسى 15 مەترلىك جەكە قۇرامعا ارنالعان تاسالارى بار ارنايى دايىندالعان وردان جۇرگىزىلدى. مەجەگە ءدوپ تيگىزۋ ءۇشىن ءاربىر كومانداعا ءۇش مينادان ءبولىندى. ءاربىر ءمۇلت كەتكەن وققا ءبىر ايىپ شەڭبەرى قوسىلىپ وتىردى.
وق اتۋلار نىسانانى ۇزدىكسىز جارىقتاندىرۋدى قامتاماسىز ەتۋ ءۇشىن بەلگىلەنگەن قارقىنمەن «وڭتۇستىك» ءوڭق 85395 اسكەري ءبولىمىنىڭ 122 م م د-30 گاۋبيتسالارىنىڭ اتىس ەسەپتوپتارىمەن جۇرگىزىلدى. كونكۋرستىڭ اقتىق كەزەڭىندە قازاقستاننىڭ مينااتقىش ەسەپتوپتارى كەدەرگىلەردى ويداعىداي ەڭسەرىپ ءوتىپ، بارىنشا جىلدامدىقتا مارە سىزىعىنا كەلىپ جەتتى. «ارتيللەريالىق وق اتۋ شەبەرلەرى» بايقاۋىنىڭ سوڭعى كەزەڭىنىڭ قورىتىندىسى بويىنشا قازاقستاننىڭ كومانداسى ۇزدىك اتاندى. ەكىنشى ورىندا رەسەي، ءۇشىنشى ورىندا قىتايدىڭ كومانداسى، ءتورتىنشى ورىندا قىرعىزستان جانە بەسىنشى ورىندا ۆەنەسۋەلا كومانداسى.
ارميا حالىقارالىق ويىندارىنىڭ بايقاۋلارى قازاقستاندا العاش رەت وتكىزىلىپ جاتقانىن ايتا كەتەيىك. بايراقتى دوداعا قاتىسۋ ءۇشىن 12 ەلدىڭ، ياعني، انگولا، ۆەنەسۋەلا، قىرعىزستان، قىتاي، رەسەي، بەلورۋسسيا، زيمبابۆە، ءۇندىستان، يران، موڭعوليا، گرەكيا جانە ارمەنيانىڭ كوماندالارى كەلدى.