مەرگەندەر «التىن ۇكى-2016» سايىسىندا زاماناۋي قارۋلاردى قولدانادى - فوتو
بۇل سايىس بارىسىندا ءوز ءىسىنىڭ ۇزدىكتەرى كەزدەستى. «بيىلعى جىلعى جارىستىڭ ەرەكشەلىگى كوماندالاردىڭ ءوز قارۋلارىمەن كەلۋىندە بولىپ وتىر. بۇل قاتىسۋشىلاردىڭ مۇمكىندىكتەرىن تەڭەستىرەدى. سونىمەن قوسا جارىستىڭ بارىنشا وبەكتيۆتى بولۋى ءۇشىن تورەلىك ەتۋ جۇيەسىن دە وزگەرتتىك. وسىنداي جارىستار مەرگەندەرگە ءبىرىن-ءبىرى بىلۋگە، قارىم-قاتىناس جاساۋعا جانە تاجىريبە الماسۋعا مۇمكىندىك بەرەدى»، - دەدى جارىستىڭ باس تورەشىسى پولكوۆنيك راۆيل جانۇزاقوۆ.
اتالعان جارىسقا ق ح ر، ا ق ش، رەسەي فەدەراتسياسى، بەلارۋس رەسپۋبليكاسى، ۇلى بريتانيا، پاكىستان، سونداي-اق قازاقستان رەسپۋبليكاسىنىڭ كۇشتىك ۆەدومستۆالارىنىڭ مەرگەندەرى قاتىسادى. سايىسقا قاتىساتىن مەرگەندەر كوپتەگەن ەلدىڭ قارۋ-جاراق قاتارىن قۇرايتىن زاماناۋي مەرگەندىك مىلتىقتىڭ ۇلگىلەرىن قولدانادى.
«بۇنداي جارىستارعا قاتىسۋدىڭ ءوزى ۇلكەن مارتەبە. وزگە كوماندالاردىڭ قالاي جۇمىس جاسايتىنىن باقىلاۋدىڭ ءوزى قىزىق. الەمدەگى مەرگەندەردىڭ تاجىريبەسىن جيناقتاۋعا بۇل تاماشا مۇمكىندىك»، - دەپ مەرگەندەر كومانداسىنىڭ كومانديرى سەرجانت ۆيلل توماس اتاپ ءوتتى.
جارىستىڭ ماقساتى - ءتۇرلى ۇلگىدەگى كاسىبي تاسىلدەردى ورىنداۋ ادىستەرىن جەتىلدىرۋ، مەرگەندەردىڭ دەنە توزىمدىلىگىنە شىداۋ مۇمكىندىكتەرىن انىقتاۋ، پسيحولوگيالىق قىسىمعا شىداۋ، سونداي-اق اتىس جانە دالالىق ماشىق دەڭگەيىن انىقتاۋ.
دالدەپ اتۋدىڭ شەبەرلەرى 5 كۇن بويى ءتۇرلى قاشىقتىقتاعى نىسانالارعا اتۋدان، جىلدام اتۋدان، بۇركەمەلەنۋ ماشىقتارى مەن ويلى-قىرلى جەرلەردى باعدارلاۋدىڭ ۇزدىگى اتانۋ ءۇشىن كۇرەسەتىن بولادى.
ەستەرىڭىزگە سالا كەتسەك، وتكەن جىلى «التىن ۇكى-2015» جارىسىندا قازاقستاننىڭ ارنايى ماقساتتاعى بولىمشەلەرى جەڭىمپاز اتانىپ، التىن كۋبوكتى يەلەندى. بۇل جارىستىڭ ءار كەزەڭى جوعارى دەڭگەيدەگى توزىمدىلىكتى، كۇش-جىگەردى، ساپالى كوماندالىق جۇمىس پەن ءار قاتىسۋشىنىڭ جاقسى دايارلىعىن تالاپ ەتتى.
