ەۋرو-2016: يسپانيا تۇركيا قۇراماسىن ويسىراتا جەڭدى

 استانا. قازاقپارات - ەۋروپا چەمپيوناتىنىڭ توپتىق كەزەڭىندە يسپانيا مەن تۇركيا قۇرامالارى كەزدەستى.

فرانسيانىڭ نيتسا قالاسىندا وتكەن ماتچ 3:0 ەسەبىمەن اياقتالدى.

 كەزدەسۋدىڭ باسىم بولىگى يسپاندىقتاردىڭ بەلسەندىلىگىمەن ءوتتى. «قىزىل سويقاندار» ەۋروپادا دوپتى يەلىك ەتۋ بويىنشا ۇزدىك كوماندا ەكەنىن بۇگىن دە دالەلدەدى. يسپانيا قۇراماسى تۇركياعا ەش مۇمكىندىك بەرگەن جوق. الاڭنىڭ بارلىق پوزيتسيالارىندا باسىم باقىلاۋدى جۇرگىزىپ وتىردى.

 تۇركيالىقتارعا دوپ بەرمەگەن يسپاندىقتار ءبىرىنشى تايمنىڭ وزىندە ەكى گول سالىپ، جانكۇيەرلەرىنە ۇلكەن قۋانىش سىيلادى. ويىننىڭ 34-مينۋتىندا نونيتو بەرگەن پاستى ۇتىمدى پايدالانعان الۆارو موراتا العاشقى گول اۆتورى اتانسا، ءۇش مينۋتتان سوڭ نونيتونىڭ ءوزى ەسەپتى 2:0-گە جەتكىزدى. ەكىنشى تايمدا تۇركيالىقتار قارسىلاستارىن قىسپاققا الماق بولدى، الايدا قارىمتا شابۋىلعا تاپ بولىپ، الۆارو موراتا 48-مينۋتتا ءۇشىنشى گولدى سالىپ كەتتى. وسىلايشا، موراتا ەۋرو-2016 تۋرنيرىندە دۋبل اۆتورى اتانعان العاشقى فۋتبولشى، ال يسپانيا ءۇش گول سالعان ءبىرىنشى قۇراما بولىپ وتىر.

 وسى جەڭىسىنەن كەيىن يسپانيا پلەي- وفف كەزەڭىنە شىعىپ وتىر.

 ايتا كەتەيىك، فۋتبولدان ەۋروپا چەمپيوناتى فرانسيادا وتۋدە. بىرىنشىلىكتىڭ اياسى بيىلدان باستاپ كەڭەيىپ، قۇرلىقتىق دودادا 16 قۇراما ەمەس، 24 كوماندا وينايتىن بولادى. فۋتبولسۇيەر قاۋىم «كارى قۇرلىقتىڭ» ەڭ مىقتى قۇرامالارىنىڭ قاتىسۋىمەن 51 ماتچ تاماشالاي الادى.

 ەۋروپا بىرىنشىلىگى فرانسيانىڭ ون قالاسىندا 10 - ماۋسىم مەن 10 - شىلدە كۇندەرى ارالىعىندا وتەدى.

بارلىق ماتچتار «قازاقستان» مەن «قازسپورت» تەلەارنالارىندا تىكەلەي ەفيردە كورسەتىلەدى.

 اۆتور: جاسۇلان جولدىبايەۆ