ەۋرو-2016: بەرند شتورك جاتتىقتىراتىن ۆەنگريا العاشقى ماچتا اۆستريانى تىزە بۇكتىردى

استانا. قازاقپارات - فۋتبولدان ەۋروپا چەمپيوناتىنىڭ العاشقى ماتچىندا ۆەنگريا قۇراماسى اۆستريا كومانداسىن 2:0 ەسەبىمەن جەڭدى.

ءبىرىنشى تايم ەكى كوماندانىڭ ءبىرىن-ءبىرى باعامداعان وتە سابىرلى تايم بولدى. نەگىزىنەن، اۆستريا قۇراماسى قاۋىپتى شابۋىلدار جاساپ وتىردى، دەگەنمەن گولدار تىركەلگەن جوق.

ەكىنشى تايمدا اۆستريا قارسىلاستاردىڭ قاقپاسىنا شابۋىل جاساۋدى جالعاستىردى. ءبىراق كەزدەسۋدىڭ 63-مينۋتىندا ۆەنگر فۋتبولشىسى ادام سالاي اۆستريا قۇراماسىنا گول سالىپ، ايدى اسپانعا شىعاردى. ءۇش مينۋتتان سوڭ اۆستريا قۇراماسى ساپىنداعى الەكساندر دراگوۆيچ قارسىلاستاردىڭ ايىپ الاڭىندا ءتارتىپ بۇزىپ، الاڭنان قۋىلادى.

سوعان قاراماستان، اۆستريا فۋتبولشىلارى ەسەپتى تەڭەستىرۋگە تالپىنادى، الايدا قارسى شابۋىلداردىڭ بىرىندە ۆەنگريا قۇراماسى ەكىنشى اۆستريالىقتاردىڭ قاقپاسىنا ەكىنشى گولدى ەنگىزىپ كەتەدى. 87-مينۋتتا سالىنعان گول اۆتورى - زولتان شتيبەر.

ەستە بولسا، ۆەنگريانىڭ باس باپكەرى بەرند شتورك 2009-2010-جىلدارى قازاقستان قۇراماسىن جاتتىقتىرعان بولاتىن. ونىڭ باپكەرلىگىمەن قازاقستان قۇراماسى الەم چەمپيوناتىنىڭ توپتىق كەزەڭىنەن شىعا المادى.

ايتا كەتەيىك، فرانسيادا فۋتبولدان ەۋروپا چەمپيوناتى ءوتىپ جاتىر.

بىرىنشىلىكتىڭ اياسى بيىلدان باستاپ، كەڭەيىپ، قۇرلىقتىق دودادا العاش رەت 24 كوماندا وينايتىن بولادى. فۋتبولسۇيەر قاۋىم «كارى قۇرلىقتىڭ» ەڭ مىقتى قۇرامالارىنىڭ قاتىسۋىمەن 51 ماتچ تاماشالاي الادى.

ەۋروپا بىرىنشىلىگى فرانسيانىڭ ون قالاسىندا 10- ماۋسىم مەن 10- شىلدە ارالىعىندا وتەدى.

بارلىق ماتچتار «قازاقستان» مەن «قازسپورت» تەلەارنالارىندا تىكەلەي ەفيردە كورسەتىلەدى.

اۆتور: جاسۇلان جولدىبايەۆ