قازاقستاندا 2016-جىلى ەكسكاۆاتور قۇراستىراتىن زاۋىت سالىنادى
بۇل تۋرالى «قازاقپارات» ح ا ا تىلشىسىنە «شىمكەنت ا ك ك» تالعات الپىسبايەۆ حابارلادى.
«رەسەي-قازاقستان ينۆەستيتسيالىق ديالوگى: ىنتىماقتاستىق ءۇشىن جاڭا مۇمكىندىكتەر» اتتى بىرلەسكەن ىسكەرلىك كونفەرەنتسياسى بارىسىندا قازاقستان مەن رەسەيدىڭ كومپانيالارى اراسىندا («شىمكەنت» ا ك ك»، «PoliPlast» ج ش س جانە «پوليپلاست» ا ب ق، UMG كومپانيالار توبى) ىنتىماقتاستىق جونىندەگى ەكى مەموراندۋمعا قول قويىلدى.
اتاپ ايتار بولساق، قازاقستان جانە رەسەي تاراپتارى قول قويعان مەموراندۋمنىڭ ءبىرى «جىلىجاي ۇجىماعى» جوباسىن جۇزەگە اسىرۋعا قاتىستى. بۇل و ق و جەرىنە جىلىجاي قۇرىلىسى تەحنولوگياسىن بەيىمدەۋ جوباسى.
جوبانى جۇزەگە اسىرۋعا قاجەتتى ينۆەستيتسيالىق سالىم 150 ميلليون دوللار شاماسىندا، ونىڭ 100 ميلليونى رەسەيلىك سەرىكتەستىكتەر تاراپىنان ينۆەستيتسيا رەتىندە كەلەدى.
ەكىنشى ىنتىماقتاستىق تۋرالى مەموراندۋم - 2016-جىلى رەسەيلىكتەر تاراپىنان وڭتۇستىك قازاقستان وبلىسىندا ەكسكاۆاتور قۇراستىرۋ زاۋىتىنىڭ قۇرىلىسىن سالۋعا قاتىستى.
ت. الپىسبايەۆتىڭ ايتۋىنا قاراعاندا، قاجەت ەتىلەتىن جاعدايدى قالىپتاستىرۋ ءۇشىن تالاپ ەتىلەتىن ينۆەستيتسيالىق قارجى - شىعىندار مەن قۇرىلعىلاردى ەسەپكە الماعاندا بەس ميلليون دوللار شاماسىندا بولادى.
«اتالعان جوبالار ەلباسى تاپسىرماسىمەن قولعا الىنعان - ۇلت جوسپارى جانە بۇرىن بەلگىلەنگەن باعدارلامالار اياسىندا جۇزەگە اسىرىلۋدا. ءبىز ونىڭ وڭىرلىك دەڭگەيدە جۇزەگە اسىرىلۋىنىڭ جولدارىن قاراستىرۋدامىز»، - دەپ اتاپ ءوتتى قازاقستاندىق كومپانيانىڭ جەتەكشىسى.
