ەكسپو نىساندارىن سالۋ بويىنشا جۇمىستاردى تولىق اياقتاۋ 2016-جىلعا جوسپارلانىپ وتىر
جينالىس بارىسىندا «استانا ەكسپو-2017» كومپانياسى مەن ەلوردا اكىمدىگى تاراپىنان دايىندىق شارالارىنىڭ نەگىزگى تۇستارى تۋرالى باياندامالار تىڭدالدى، دەپ حابارلايدى astana.kz.
اتاپ ءوتۋ كەرەك، تاراپتار اراسىندا 50 ءىس-شارانى وتكىزۋدى كوزدەيتىن 2018-جىلعا دەيىنگى جۇمىس جوسپارى ازىرلەنگەن، سونىمەن قاتار، قالانىڭ بارلىق قىزمەتتەرى مەن ۇلتتىق كومپانيانىڭ بىرلەسە جۇمىس اتقارۋىنا تۇرتكى بولىپ وتىرعان سەرىكتەستىك مەموراندۋمى جۇزەگە اسىرىلۋدا. جيىندا ەكسپو-2017 كورمەسىنە دايىندىق اياسىندا، ءبىرىنشى كەزەكتەگى ماسەلەلەرگە نازار اۋدارا وتىرىپ، ورتاق جۇمىس جوسپارىن جانداندىرۋ تاپسىرىلدى.
«ءبىزدى ۇلكەن دە جاۋاپكەرشىلىكتى جۇمىس كۇتىپ تۇر. ۇلتتىق كومپانيا مەن ەلوردا اكىمدىگىنىڭ قىزمەتتەرى ءوز جۇمىستارىن ءبىر ارناعا توعىستىرۋى كەرەك. الدىمىزدا ورتاق ماقساتتار تۇر، ولاردىڭ ورىندالۋى ءۇشىن ءبىز ءبىر ۇجىم رەتىندە جۇمىس ىستەۋىمىز كەرەك»، - دەدى ەلوردا اكىمى.
كورمەنى وتكىزۋ جانە وعان دايىندىق شارالارى مەن باعىتتارى اكىمدىك ءۇشىن دە، «استانا ەكسپو-2017» كومپانياسى ءۇشىن دە ورتاق بولۋى كەرەك. قۇرىلىس جۇمىستارىنىڭ كەستەسىنە ساي 2016-جىلى ەكسپو نىساندارىن سالۋ بويىنشا جۇمىستار تولىق اياقتالۋى ءتيىس. استانا اكىمدىگى كورمەگە دايىندىق اياسىندا قالانىڭ ينفراقۇرىلىمى مەن ەلوردالىق سەرۆيس ساپاسىن جاقسارتۋ، سونداي-اق، اقپاراتتىق جۇمىس پەن شەت ەلدەردەن قوناقتاردى تارتۋ بويىنشا ۇلكەن جۇمىستار اتقارۋدا. ەكسپو كەزىندە وتكىزىلەتىن شارالار لەگىنە ەرەكشە كوڭىل بولىنۋدە. كورمە وتەتىن كۇندەرى ەلوردادا الەم استانالارى كۇنى، فەستيۆالدەر، كونسەرتتىك باعدارلامالار، حالىقارالىق جارىستار، سپورتتىق شارالار مەن بيزنەس-فورۋمدار وتكىزۋ كوزدەلگەن. قاۋىپسىزدىك شارالارىن قامتاماسىز ەتۋ سۇراقتارى دا نازاردان تىس قالماۋدا.
لوگيستيكا ماسەلەسى دە ەرەكشە ماڭىزعا يە. قازىرگى ۋاقىتتا حالىقارالىق اۋەجاي تەرمينالىن كەڭەيتۋ، تەمىر جول ۆوكزالى مەن جەڭىل رەلستى كولىك جولاقتارىن سالۋ سەكىلدى ءبىرقاتار ءىرى جوبالار جۇزەگە اسىرىلۋدا. بۇل رەتتە ەلوردا قوناقتارى ءۇشىن ناۆيگاتسيا جۇيەسى دە جاقسارتىلادى.
قازاننىڭ 31- كۇنى ميلاندا ەكسپو-2015 حالىقارالىق مامانداندىرىلعان كورمەسى ءوز جۇمىسىن اياقتاپ، استانادا ەكسپو-2017 تۋىن سالتاناتتى تۇردە تابىستاۋ ءراسىمى وتەدى. «سول مەزەتتەن باستاپ ءبىزدىڭ كورمەگە باسىم نازار اۋدارىلادى»، - دەدى احمەتجان ەسىموۆ. «بارلىق مەملەكەتتىك ورگاندار مەن وبلىس اكىمدىكتەرى تارتىلعان ەكسپو-2017 جوباسىنىڭ اۋقىمدىلىعىنا قاراماستان، بارلىق اۋىرتپالىق ۇلتتىق كومپانيا مەن ەلوردا اكىمدىگىنە تۇسۋدە. بىزدە كورمەنىڭ دۇرىس ءوتۋ ءۇشىن ءوزارا تۇسىنىستىك پەن سەرىكتەستىكتىڭ بولعانى وتە ماڭىزدى»، - دەدى جيىن بارىسىندا «استانا ەكسپو-2017» ۇ ك ءتوراعاسى.
