كوكشەتاۋ زاۋىتىندا العاشقى كومباين 2016- جىلى شىعادى

استانا. قازاقپارات - كوكشەتاۋ زاۋىتىندا العاشقى كومباين 2016 -جىلى شىعاتىن بولادى. «قازاگرو» حولدينگى ءوزى قىزمەت ەتكەن 7 جىلدا 200 ميلليارد تەڭگەدەن اساتىن 326 جوبانى ىسكە قوستى.

بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە «قازاگرو» ۇلتتىق باسقارۋشى حولدينگى» ا ق باسقارما ءتوراعاسىنىڭ ورىنباسارى قايرات ايتۋعانوۆ وسىلاي مالىمدەدى.

ءتوراعا ورىنباسارىنىڭ ايتۋىنا قاراعاندا، ەۋرازيالىق ەكونوميكالىق وداق اياسىندا اگرارلىق سەكتوردىڭ ينتەگراتسياسى دا بارىنشا قارقىندى دامىماق. اتاپ ايتقاندا، بىلتىر تامىز ايىندا قول قويىلعان كەلىسىم بويىنشا كوكشەتاۋ قالاسىندا كومباين زاۋىتىنىڭ قۇرىلىسى باستالعان. «زاۋىتتىڭ العاشقى كومباينى 2016- جىلى شىعارىلادى. سوسىن جوبا بويىنشا جىلىنا وسىندا 300 كومباين شىعاتىن بولادى»، - دەدى ق. ايتۋعانوۆ.

اۆتور: قانات مامەتقازى ۇلى