ريو-2016: قازاقستاننىڭ وليمپيادا قورجىنىندا قازىر 86 ليتسەنزيا بار
بۇل تۋرالى ۇلتتىق وليمپيادا كوميتەتى (ۇ و ك) حابارلادى.
كەشە بىردەن قازاقستاندىق 3 جەڭىلاتلەت ريو-دە-جانەيروداعى ليتسەنزيالارعا يە بولدى. ولار بۇگىنگى كۇندەرى الماتىدا ءوتىپ جاتقان قازاقستان كۋبوگىندا نورماتيۆتەردى ورىندادى.
الماتىلىق سپورتشى اناستاسيا پيليپەنكو 100 مەترگە جۇگىرۋدەن 12,87 سەكۋند ناتيجە كورسەتتى. ال سولتۇستىك قازاقستان وبلىسىنىڭ جەڭىلاتلەتتەرى ەكاتەرينا ەكتوۆا ءۇش قارعىپ سەكىرۋدەن جانە مارگاريتا مۇقاشيەۆا - 800 مەترگە جۇگىرۋدەن كوزگە ءتۇستى.
اتاپ وتەيىك، قازىرگى كەزدە استانادا ءوتىپ جاتقان ايەلدەر اراسىنداعى بوكستان الەم چەمپيوناتىندا قازىردىڭ وزىندە التى قازاقستاندىق قىز ىرىكتەۋ تۋرنيرىنىڭ جارتىلاي فينالىنا شىقتى.
ن. قىزايباي ءۇندىستاندىق ساردجۋبالا سامدجەتسابامدى جەڭىپ، جارتىلاي فينالعا شىعىپ، كەمىندە قولا مەدالعا يە بولماق.
قازاقستان 27 سپورت تۇرىنەن ريوداعى جازعى وليمپيادالىق ويىندارعا قاتىسۋ ءۇشىن 100 دەن استام جولداماعا قول جەتكىزۋدى كوزدەپ وتىر. وتكەن لوندونداعى وليمپيادادا ءبىزدىڭ قۇرامادا 25 سپورت تۇرىنەن 105 جولداما بولعان ەدى.
بۇدان بۇرىن حابارلانعانداي، 29- مامىردا قازاقستاندا حالىقارالىق وليمپيادا كوميتەتىنىڭ باستاماسىمەن وليمپيادا كۇنى اتالىپ وتەدى، وندا سپورت جانكۇيەرلەرى قازاقستاندىق وليمپيادا چەمپيوندارىمەن كەزدەسەتىن بولادى.
