ريو-2016 كۇنتىزبەسى: 13 - تامىزدا وليمپيادا چەمپيونى ولگا رىپاكوۆا ونەر كورسەتەدى

استانا- ريو- دە- جانەيرو. قازاقپارات - 13 - تامىز كۇنى، ريو- دە جانەيروداعى وليمپيادا ويىندارىندا قازاقستاندىقتار بىرنەشە سپورت ءتۇرى بويىنشا سىنعا شىعادى، دەپ حابارلايدى «قازاقپارات» ءتىلشىسى.
None
None

 تاڭعى ساعات 04:00-دە «ريوسەنترو» كەشەنىندە اۋىر اتلەتيكادان سايىستار باستالادى. جارىس جولىنا 85 كەلىگە دەيىنگى سالماقتا سپورتشىلار شىعادى. قازاقستان نامىسىن دەنيس ۇلانوۆ قورعايتىن بولادى. 2016 -جىلى ءساۋىر ايىندا ول اۋىر اتلەتيكادان وتكەن ازيا چەمپيوناتىندا جەڭىمپاز اتانسا، 2015 -جىلدىڭ جەلتوقسان ايىندا گروزنىيدا وتكەن حالىقارالىق تۋرنيردە كۇمىس مەدال ەنشىلەگەن. ءبىزدىڭ قۇرامادا اتى تانىلماعان دەنيس ۇلانوۆ الەكسەي نيدىڭ جاسىرىپ وتىرعان كوزىرلەرىنىڭ ءبىرى بولۋى ىقتيمال.

كەشكى ساعات 18:40-تا وليمپيادا ستاديونىندا جەڭىل اتلەتيكادان سايىستار وتەدى. ءۇش اتتاپ سەكىرۋدەن ءبىزدىڭ قۇرامانىڭ مايتالمان سپورتشىلارىنىڭ ءبىرى، لوندون وليمپياداسىنىڭ چەمپيونى ولگا رىپاكوۆا قاتىسادى دەپ كۇتىلۋدە.

سونىمەن قاتار ولگا رىپاكوۆانىڭ ءىزباسارى يرينا ليتۆينەنكو دا وسى سىندا باق سىنايدى.

20:00-دە قازاقستان جانكۇيەرلەرى بوكسشى ولجاس ساتتىبايەۆتىڭ ونەرىن تاماشالاي الادى. قازاقستاندىق بوكسشى ءۇشىن بۇل العاشقى وليمپيادا، ال ونىڭ قارسىلاسى پۋەرتوريكولىق دجيەۆەر سينترون وكاسيو لوندون وليمپياداسىندا ويقاستاعان ورەننىڭ ءبىرى جانە ۇلكەن تاجىريبەگە يە. قاي جەڭگەنى ريو ويىندارىنىڭ 1/8 فينالىنا جولداما الادى.

 ءبىز ءۇشىن تاڭسىق سپورت ءتۇرى بار، ول - باتۋتتا سەكىرۋ . «جەكە سەكىرۋ» سايىسى 2000 - جىلدان باستاپ وليمپيادا ويىندارىنىڭ باعدارلاماسىنا ەنگىزىلگەن. ءبىزدىڭ ەلدىڭ اتىنان بۇل سىنعا شىمكەنتتىك سپورتشىمىز پيرمامماد اليەۆ شىعادى. ەستەرىڭىزگە سالا كەتەيىك، وليمپيادا جولداماسىن ول ريو- دە- جانەيرودا وتكەن ليسەنزيالىق تۋرنيردە جەڭىپ العان ەدى. 2015 -جىلدان بەرى سپورتشى امەريكا قۇراما شتاتتارىندا جەتەكشى مامان دميتري پوليارۋشتىڭ قول استىندا دايىندالۋدا. قازىرگى ۋاقىتتا پيرمامماد ەلىمىزدىڭ باس باپكەرى سەرگەي ۆەرتيانكيننىڭ جەتەكشىلىگىمەن قاتىسىپ وتىر. وليمپيادالىق جارىس استانا ۋاقىتىمەن 23:03-تە باستالادى. الييەۆپەن قاتار بۇل دودادا الەمنىڭ وزگە دە مەملەكەتتەرىنەن 16 سپورتشى قاتىسادى.

 اۆتور: جاسۇلان جولدىبايەۆ

سوڭعى جاڭالىقتار