ريو-2016: وليمپيادانىڭ ونىنىشى كۇنى قازاق قورجىنى 1 كۇمىس، 1 قولا مەدالمەن تولىقتى

دەپ حابارلايدى ريوداعى قازاقپارات ءتىلشىسى بۇگىنگى كۇنگە جاساعان قورىتىندىسىندا.
وليمپيادانىڭ ونىنشى كۇنى دە ارتتا قالدى. بۇل كۇنى مەدالدارمەن بىرگە اتتەگەن- ايىمىز دا بولعانى جاسىرىن ەمەس.
ەڭ اۋەلى اڭگىمەمىزدى جەتىستىگىمىزدەن باستايىق. برازيليا ۋاقىتىمەن ساعات 18:00-دە بوكس وتەتىن ستاديونعا قاراي بەت بۇردىق. ادامنىڭ كوپتىگىنەن بولار، كورەرمەندەر كىرەتىن ەسىكتەن ەمەس، ارنايى جۋرناليستەر كىرەتىن ەسىكتىڭ الدىندا ۇزاق سونار كەزەك باستالدى. سەبەبى، شارشى الاڭعا ءبىر ەمەس قازاقتىڭ ەكى بىلعارى قولعاپ شەبەرى شىعايىن دەپ جاتىر. ءبىرى ريو وليمپياداسىنىڭ التىنىنا تالاسسا، ەكىنشىسى فينالعا شىعۋ ءۇشىن جەكپە- جەگىن وتكىزبەك.
نە كەرەك، بوكس وتەتىن ستاديونعا كىرىپ كەلسەك ينە شانشار ورىن جوق. قازاقستاندىق جانكۇيەرلەردىڭ دە قاراسى قالىڭ.
ءبىرىنشى دانيار ەلەۋسىنوۆ شارشى الاڭعا شىقتى. زال بىتكەن قول شاپالاقتاپ، «قازاقستان، قازاقستان» دەپ ۇرانداتتى. ءتىپتى، ءبىز مۇلدەم تانىمايتىن، بىلمەيتىن وزگە ەلدىڭ وكىلدەرى دە «قازاق، قازاق» دەپ ايعايلاپ جاتتى. دانيار ءبىرىنشى راۋندتا قارسىلاسىن ايقىن باسىمدىقپەن ۇتتى. ەكىنشى راۋند ەندى باستالعانى سول ەدى، قارسىلاسى باسىمەن دانياردىڭ شەكەسىنەن وڭدىرماي ءسۇزىپ قالدى. وسى ساتتە ءبىزدىڭ بوكسشىنىڭ قاباعى جارىلىپ، قان بۇرق ەتە قالدى. تورەشى، قازاق بوكسشىسىنىڭ قارسىلاسىنا ەسكەرتۋ جاساپ، جارىستى توقتاتتى. ارى قاراي دارىگەرلەر قاراپ كوردى دە جەرلەسىمىزگە جارىستى جالعاستىرۋعا رۇحسات بەرمەدى. ناتيجەسىندە تورەشى بوكستا رۇحسات ەتىلمەگەن ارەكەتتى پايدالانعانى ءۇشىن دانياردىڭ قارسىلاسىن جارىس جولىنان تايدىرىپ، جەڭىستى قازاق بوكسشىسىنا سىيلادى. وسىلايشا دانيار ەلەۋسىنوۆ فينالعا جولداما الدى.
كەزەك ليەۆيتكە دە كەلىپ جەتتى. زال تولى تاعى دا «قازاقستان، قازاقستان» دەپ ۇرانداتتى. ءبىرىنشى راۋندتان جارىس اياقتالعانشا بۇل «ۇران» تولاستاعان جوق. قازاقستاندىق بوكسشى دا جانكۇيەرلەرىنىڭ قولداۋىن سەزىنسە كەرەك، ءار راۋند سايىن قارقىنىن ۇدەتىپ، قارسىلاسىن اۋىر سوققىلارىمەن بۇرىشتان- بۇرىشقا تىقسىرۋمەن بولدى. الايدا، جەكپە- جەك اياقتاپ، تورەشى جەڭىمپازدىڭ قولىن كوتەرگەن دە، ەشكىم كۇتپەگەن، ەشكىم ويلاماعان جاعدايعا تاپ بولدىق. تورەشى رەسەيلىك بوكسشى جەڭىمپاز دەپ ساناپ، سونىڭ قولىن كوتەردى. ادىلدىكتى بەلدەن باسقان تورەشىلەرگە زالدا قارعىس جاۋدىرماعان ادام بولماعان شىعار بالكىم. قاسىمىزدا وتىرعان وزگە ەلدىڭ كورەرمەندەرى قولىمىزدى الىپ، تورەشىلەرگە ساۋساعىن شوشايتتى. مىنە، وسىدان- اق، كىمنىڭ جەڭىمپاز ەكەنىن انىق كورۋگە بولاتىن شىعار...
مىنە، وسىلايشا ۆاسيلي ليەۆيت جەڭىپ تۇرىپ، ريو وليمپياداسىنىڭ كۇمىس جۇلدەگەرى اتاندى. ەگەر، رەسەي بۇل التىندى وسىلاي «قاراڭعىلىق» جولمەن الماعاندا بوكس قۇراماسى التىنسىز قايتاتىنى انىق ەدى. باسقا بىردە- ءبىر بوكسشىلارى فينالعا جەتە الماي قالعان ەدى.
بوكس اياقتالا سالا، اۋىر اتلەتتەر ونەر كورسەتىپ جاتقان ستاديونعا جۇگىردىك. باعىمىزعا جاراي ول جەردەن دە ءبىر مەدال بۇيىردى. 105 كەلى دە ەل نامىسىن قورعاعان قىزىلوردالىق قىرانىمىز الەكساندر زايچيكوۆ قورجىنىمىزعا تاعى ءبىر قولا جۇلدە سىيلادى. وسىلايشا بۇگىن قازاق ەلى ريودا ءبىر كۇمىس، ءبىر قولاعا قول جەتكىزدى.
ەندى وزگە سپورتشىلارمىزعا قىسقاشا توقتالىپ وتەيىك. كەشە، گرەك- ريم كۇرەسىنەن ەكى بالۋانىمىز جارىستى جۇلدەسىز اياقتاعان سوڭ، بۇگىن نۇرماحان تىناليەۆتىڭ جولىنا ۇمىتپەن قارادىق. وكىنىشكە قاراي الىبىمىز بارلىق جانكۇيەرلەرىن جەرگە قاراتتى. ول 1/8 فينالدا گەرمانيالىق ەدۋارد پوپتان ۇتىلىپ قالدى.
سونداي- اق، 1000 مەترگە بايداركا جانە كانوەدا جەكەلەي ەسۋ سايىسىندا قازاقستاندىق يليا گولەندوۆ كەلەسى كەزەڭگە وتە المادى. وسى سىندا ونەر كورسەتكەن تاعى ءبىر سپورتشىمىز تيمۋر حايداروۆ جارىس جولىنان شىعىپ قالدى.
ال بايداركادا 500 مەترگە جۇپتاسىپ ەسۋ سايىسىندا يرينا پودوينيكوۆا مەن ناتاليا سەرگەيەۆا فينالعا شىقتى. ولار جارتىلاي فينالدا 1:43,577 ۋاقىتپەن مارە سىزىعىن ءۇشىنشى بولىپ كەستى. وسىلايشا، پودوينيكوۆا مەن سەرگەيەۆا بايداركادا 500 مەترگە جۇپتاسىپ ەسۋ سايىسىنىڭ فينالىنا ءوتتى.
سونىمەن قاتار كەدەرگىمەن 400 مەترگە جۇگىرۋدە قازاقستاندىق جەڭىل اتلەت دميتري كوبلوۆ كەلەسى كەزەڭگە وتە المادى. ول ىرىكتەۋ جارىسىندا 400 مەتردى 49.87 سەكۋندتا جۇگىرىپ ءوتتى. وسىلايشا، ول جالپى كوماندالىق ەسەپتە 32- ورىنعا تۇراقتادى.
200 مەترگە جۇگىرۋ سايىسىنا سىنعا تۇسكەن ۆيكتوريا زيابكينا مەن ولگا سافرونوۆا جارتىلاي فينالعا شىعا المادى.
سونىمەن قاتار 200 مەترگە العاشقى كەزەڭنىڭ التىنشى جۇگىرۋىندە ۆيكتوريا زيابكينا 23,34 سەكۋندپەن 7- ورىنعا يە بولدى. ال ولگا سافرونوۆا ىرىكتەۋ كەزەڭىنىڭ توعىزىنشى جۇگىرۋىندە 4- ورىننان كورىندى.
جەرلەسىمىز 200 مەتردى 23,29 سەكۋندتا باعىندىردى. وسىلايشا، قازاقستاندىق جەڭىل اتلەتتەر ريو وليمپياداسىن جۇلدەسىز اياقتادى.
ەندى، قايتادان بۇگىنگى بوكسشىلارىمىزعا ورالساق. بۇگىن ەكى بوكسشىمىزدىڭ ءبىرى كۇمىس ولجالاسا، ءبىرى فينالعا شىقتى. الايدا، ءتۇستىڭ الدىنداعى سەسسيادا جۇدىرىقتاسقان ەكى بوكسشىمىز ريو وليمپياداسىنداعى جارىستارىن اياقتاعان بولاتىن. ولار 52 كەلىدە ونەر كورسەتكەن ولجاس ساتتىبايەۆ پەن 75 كەلىدەگى شارشى الاڭعا شىققان جانىبەك ءالىمحان ۇلى بولاتىن.
ولجاس ساتتىبايەۆ 1/8 فينالدا ازەربايجاندىق الەم چەمپيونى ەلۆين ماميشزادان ۇتىلىپ قالدى. ءۇش راۋندتا دا تورەشىلەر جەڭىستى ازەربايجان بوكسشىسىنا بەردى. وسىلايشا، ولجاس ساتتىبايەۆ شيرەك فينالعا شىعا المادى.
ال جانىبەك ءالىمحان ۇلى شيرەك فينالدا ازەربايجاندىق كامران شاحسۋۆارلىدان جەڭىلىپ قالدى. وليمپيادانىڭ ونىنشى كۇنى دە ارتتا قالدى.
بۇگىن قازاقستان قۇراماسى جالپى ەسەپتە 2 التىن، 3 كۇمىس، 5 قولا مەدالمەن جالپى ەسەپتە 15-ورىنعا كوتەرىلدى.
اۆتور: كۇنسۇلتان وتارباي