الماتىدا «ۇزدىك ينجەنەر-2015» بايقاۋىنىڭ جەڭىمپازدارى ماراپاتتالدى
بايقاۋدىڭ ۇيىمداستىرۋشىسى - ق ر ۇلتتىق ينجەنەرلىك اكادەمياسى.
«ءبىزدىڭ ويىمىزشا، الەمدەگى ەڭ دامىعان 30 ەلدىڭ قاتارىنا ەنۋ جولىندا باستى ماماندىق يەلەرىنىڭ ءبىرى - ينجەنەر.
سوندىقتان، بۇل بايقاۋ ينجەنەرلىك كادرلاردىڭ مارتەبەسىن نىعايتۋعا جانە يندۋستريالدى جوبالاردى جۇزەگە اسىرۋعا قوماقتى ۇلەس قوسقان مامانداردى ىنتالاندىرۋعا باعىتتالعان»، - دەدى ءوز سوزىندە ق ر ۇلتتىق ينجەنەرلىك اكادەمياسىنىڭ پرەزيدەنتى باقىتجان جۇماعۇلوۆ.
بايقاۋعا قازاقستاننىڭ بارلىق وڭىرىنەن 350 ۇمىتكەر ۇسىنىلعان بولاتىن. ءادىلقازىلار القاسىنىڭ شەشىمى بويىنشا 11 جەڭىمپاز تاڭداپ الىندى. ولاردىڭ ىشىندە «ورال زاۋىتى» ا ق باس كونسترۋكتورى حايدار حابيبۋلين دە بار.
«مەن «شەكارالىق جانە زىمىران-ارتيللەريالىق كەمەلەردىڭ پايدالانۋ سيپاتىن جاڭعىرتۋ جانە جاقسارتۋ» دەپ اتالاتىن جوبام ءۇشىن ماراپاتتالدىم. كەمە جاساۋ - ەڭ كۇردەلى سالالاردىڭ ءبىرى. الايدا، ءبىزدىڭ زاۋىتتىڭ دامۋ دەڭگەيىن جوعارى دەپ ايتۋعا بولادى. سوندىقتان دا ءبىز بولاشاققا سەنىممەن قارايمىز. ال مۇنداي بايقاۋلار تەحنيكالىق باعىتتاعى مامانداردى ىنتالاندىرادى جانە ينجەنەرلىك ءىستى ناسيحاتتايدى»، - دەدى ح. حابيبۋلين.
سونداي-اق، «الماتى كوپىرلى قۇرىلىم زاۋىتى» ج ش س باسقارماسىنىڭ ءتوراعاسى احمەتجان شاردينوۆ تا ديپلوم جانە مەدالمەن ماراپاتتالدى. ول ت م د اۋماعىندا تەڭدەسى جوق - ۇزىندىعى 42 مەتر بولاتىن تەمىربەتوندى ارقالىق زەرتتەمەسىن ازىرلەگەن.
«الەمدىك قارجى داعدارىسى ۋشىعىپ تۇرسا دا ءبىزدىڭ پرەزيدەنتىمىز ەلدىڭ يندۋستريالدى-يننوۆاتسيالىق دامۋ سالاسىنا كوپ كوڭىل بولەدى. ياعني، ينجەنەرلەر كەرەك دەگەن ءسوز. ارينە، مۇنداي بايقاۋلار ينجەنەرلىك ماماندىقتىڭ دامۋىنا سەپتىگىن تيگىزەدى»، - دەدى ا. شاردينوۆ.
اۆتور: جاپپاربەرگەن ايبوتا
