ۋنيۆەرسيادا-2015: قازاقستان التىن مەدالدار سانى جاعىنان ءوز رەكوردىن جاسادى
شىلدەنىڭ 3- كۇنى وڭتۇستىك كورەيانىڭ كۆاندجۋ قالاسىندا جالاۋى جەلبىرەگەن الامان دودانىڭ الاۋى ءسوندى. وعان الەمنىڭ 146 ەلىنەن كەلگەن 12896 سپورتشى سايىستىڭ 21 تۇرىنەن باق سىناپ، 272 مەدال جيىنتىعىن ساراپقا سالدى. بۇل جارىسقا قازاقستاننان 95 سپورتشى قاتىسىپ، 6 التىن، 4 قولا مەدالمەن جالپى كوماندالىق ەسەپتە 11-ورىندى جەڭىپ الدى.
بىردەن ايتا كەتەيىك، قازاقستان قۇراماسى جازعى دۇنيەجۇزىلىك ۋنيۆەرسيادا تاريحىندا بيىل ءبىرىنشى رەت التىن مەدالدار سانى جاعىنان ەڭ ۇزدىك ناتيجەگە قول جەتكىزىپ، ءوز رەكوردىن جاسادى. ال بۇعان دەيىن 2007-جىلى بانگكوك قالاسىندا 5 التىن مەدالمەن جالپى كوماندالىق ەسەپتە تاعى دا 11-ورىندى يەلەنگەن بولاتىنبىز.
تورتكۇل دۇنيەنىڭ ءار قيىرىنان جينالعان ستۋدەنتتەر اكادەميالىق ەسۋ، بادمينتون، باسكەتبول، بەيسبول، ۆولەيبول، گولف، دزيۋدو، جەڭىل اتلەتيكا، ءجۇزۋ، كوركەم گيمناستيكا، قول دوبى، نىسانا كوزدەۋ، ساداق اتۋ، سەمسەرلەسۋ، سپورتتىق گيمناستيكا، سۋ دوبى، سۋعا سەكىرۋ، تاەكۆوندو، تەننيس، ۇستەل تەننيسى، فۋتبول سەكىلدى سپورت تۇرلەرى بويىنشا سايىسقا ءتۇستى. وسى سايىس تۇرلەرىنەن ءبىرىنشى بولىپ قازاقستان قورجىنىنا التىن مەدالدى 2014-جىلعى ازيا ويىندارىنىڭ ءۇش دۇركىن چەمپيونى، ءال- فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى دميتري بالاندين سالدى.
قازاقستان ۇلتتىق قۇراماسىنىڭ قورجىنىنا العاشقى التىن جۇلدەنى ءجۇزۋشى دميتريي بالاندين (ءجۇزۋ، 100 مەتر، براسس) اكەلدى. وسىدان كەيىن ول براسس ادىسىمەن 50 مەتر قاشىقتىقتا قولا جۇلدە جەڭىپ الدى.
قازاقستاننىڭ ۋنيۆەرسياداداعى «جارىق جۇلدىزىنا» اينالعان جەڭىل اتلەت ۆيكتوريا زيابكينا ءبىر ءوزى قازاقستان قورجىنىنا 3 التىن جۇلدە سالدى. ول جەكەلەي سىندا 100 جانە 200 مەتر قاشىقتىقتا چەمپيون اتاندى. سونىمەن قاتار، كوماندالىق ەستافەتادا (4x100) اناستاسيا تالاپينا، سۆەتلانا يۆانچۋكوۆا جانە يۋليا راحمانوۆامەن بىرگە ۋنيۆەرسيادا جەڭىمپازى بولدى.
وسىعان قوسا تاەكۆوندوشى نۇرسۇلتان مامايەۆ پەن سىرىقپەن سەكىرۋشى نيكيتا فيليپپوۆ تا جەڭىستىڭ ەڭ بيىك ساتىسىنا كوتەرىلىپ، 5-6-التىن جۇلدەمەن قازاقستان قۇراماسىن جالپى ەسەپتە 11-ورىنعا كوتەرىلۋىنە ءوز ۇلەستەرىن قوستى. ال تاعى ءۇش قولا جۇلدەنى دزيۋدوشى جانار قاشقىن (70 كەلى) مەن ستەندىك اتۋدان ەرلەر جانە ايەلدەر قۇراماسى اكەلدى.
6 التىن مەدالدىڭ بەسەۋىن ءال-فارابي اتىنداعى قاز ۇ ۋ ستۋدەنتتەرى جەڭىپ الدى. دۇنيەجۇزىلىك ۋنيۆەرسيادانىڭ تاريحىنا ءۇڭىلىپ قارايتىن بولساق، وسىعان دەيىن وسىنداي كوپ كولەمدى التىن مەدالداردى ءبىر جوعارى وقۋ ورنىنىڭ ستۋدەنتتەرى الىپ كورمەگەن ەكەن. دەمەك بۇل دا بيىلعى دوداداعى باستى جاڭالىقتاردىڭ ءبىرى دەۋگە تولىق نەگىز بار.
وسى جەردەن ءسال شەگىنىس جاساپ، قازاقستان دەربەس كوماندا رەتىندە دۇنيەجۇزىلىك ۋنيۆەرسياداعا قاتىسقان 1993-جىلدان بەرگى كورسەتكىشتەرىنە قىسقاشا توقتالا كەتكەندى ءجون كوردىك.
1993-جىلى ا ق ش- تىڭ بۋففالو قالاسىندا وتكەن جارىستا جەرلەستەرىمىز جالعىز كۇمىس مەدالدى يەلەنىپ، ارمەنيا، برازيليا، ەستونيا، ليتۆامەن بىرگە 31-35-ورىنداردى ءوزارا ءبولىستى. مۇندا ا ق ش 73 (31 التىن، 23 كۇمىس، 19 قولا) باس جۇلدەنى، قىتاي (17+6+5) ەكىنشى ورىندى، كانادا (11+13+14) ءۇشىنشى ورىندى يەلەندى.
1995-جىلى جاپونيانىڭ فۋكۋوكا قالاسىندا قازاقستان 2 كۇمىس مەدال ولجالاپ، 33-ورىندى مىسە تۇتتى. ءبىرىنشى ورىندى امەريكالىقتار (24+28+17)، ەكىنشى ورىندى جاپوندار (24+16+24)، ءۇشىنشى ورىندى رەسەي قۇراماسى (15+12+23) جەڭىپ الدى.
ال قازاقستان قۇراماسى 1997-جىلى جانە 1999-جىلى وتكەن دۇنيەجۇزىلىك ۋنيۆەرسيادادا بىردە ءبىر مەدالعا قول جەتكىزە المادى.
2001-جىلى بەيجىڭگە ساپار شەكتىك. وندا قازاقستاننىڭ ءۇش سپورتشىسى كۇمىس مەدالعا يە بولىپ، جالپى ەسەپتە 33-ورىنعا جايعاستىق. بۇل جارىستا قىتاي قۇراماسى 103 (54+24+25) باس جۇلدەنى ولجالاسا، ا ق ش (21+13+13) ەكىنشى ساتىعا سىرعىدى. رەسەي (14+18+21) ءۇشىنشى ورىندى يەمدەندى.
2003-جىلعى وڭتۇستىك كورەيانىڭ تەگۋ شاھارىندا وتكەن دودادا قازاق ەلىنىڭ ءانۇرانى العاش رەت شىرقالدى. 2 التىن جانە 4 كۇمىس مەدال ەنشىلەپ، جالپى ەسەپتە 18-ورىنعا كوتەرىلدىك. وسىلايشا، قازاقستاندا ستۋدەنتتىك سپورتتىڭ ورلەۋ كەزەڭى باستالدى. جالپى ەسەپتە قىتاي (41+27+13) قايتا كوش باستاسا، رەسەي (26+22+34) مەن جارىس قوجايىندارى (26+12+17) ەكىنشى جانە ءۇشىنشى ورىنداردى يەلەندى.
2005-جىلى تۇركيانىڭ يزميرىندە وتكەن باسەكەدە قازاقستان قۇراماسى 1 التىن، 2 كۇمىس جانە 6 قولا مەدالمەن 26-ورىنعا تۇراقتادى. تۇركيادا رەسەي ستۋدەنتتەرى 65 (26+16+23) كوش باستادى. بۇل رەسەي سپورتشىلارىنىڭ ءوز تاريحىندا تۇڭعىش رەت جالپى ەسەپتە كوش باستاۋى ەدى. ودان كەيىنگى ساتىعا قىتاي (21+16+12) مەن جاپونيا (18+18+20) جايعاستى.
2007-جىلى تايلاندتىڭ استاناسى - بانگكوكتا قازاقستان قۇراماسى جوعارىدا اتاپ وتكەنىمىزدەي بۇرىن-سوڭدى بولماعان كورسەتكىشكە قول جەتكىزدى. 5 التىن، 4 كۇمىس جانە 5 قولانى قانجىعاسىنا بايلاپ، تۇڭعىش رەت مىقتىلار تىزىمىندە 11-ورىنعا كوتەرىلدى. العاشقى ۇشتىكتە قىتاي (32+29+26)، رەسەي (28+27+37) جانە ۋكراينا (18+20+18). ءبىز مىنە وسى رەكوردتى بيىل جاڭالاپ وتىرمىز.
2009-جىلى بەلگرادتا 1 التىن، 2 كۇمىس جانە 4 قولانى قورجىنعا سالعان جەرلەستەرىمىز 32- ورىنعا تابان تىرەدى. بۇل جىلعى دودا رەسەيدىڭ (29+22+27) جەڭىسىمەن اياقتالدى. ودان كەيىنگى تۇعىردا - قىتاي (22+21+15) مەن وڭتۇستىك كورەيا (21+11+15).
2011-جىلى قىتايدىڭ شەنچجەن شاھارىنا 3 كۇمىس جانە 3 قولا مەدالمەن قازاقستاندىقتار 45-ورىنعا ءبىر-اق سىرعىدى. جارىس قوجايىندارى (75+39+31) باس جۇلدەنى، رەسەي (42+45+45) ەكىنشى ورىندى، وڭتۇستىك كورەيا (28+21+30) ءۇشىنشى ورىندى يەلەندى.
2013-جىلى تاتارستاننىڭ قازان قالاسىندا وتكەن دۇنيەجۇزىلىك سىندا قازاقستان قۇراماسى 3 التىن، 11 كۇمىس جانە 16 قولا مەدالدى يەلەنىپ، 19-ورىنعا قايتا كوتەرىلدى. قازاندا رەسەي قۇراماسى (155+75+62) كوش باستادى. ەكىنشى جانە ءۇشىنشى ورىنداردا - قىتاي (26+29+22) مەن جاپونيا (24+28+32) ءوزارا ءبولىستى.
ال بيىل جەرلەستەرىمىز جاقسى قىرىنان كورىنىپ، جالپى ەسەپتە الەم بويىنشا 11-ورىنعا قايتا كوتەرىلدى. بۇلدا بولسا ەلىمىزدە سپورتتىڭ دامىپ كەلە جاتقاندىعىنىڭ بەلگىسى.
بيىلعى ۋنيۆەرسيادادا ۇزدىك ونەر كورسەتكەن مەملەكەتتەر:
1.و. كورەيا - 44 التىن، 28 كۇمىس، 26 قولا، جالپى - 98
2.رەسەي - 32 التىن، 37 كۇمىس، 44 قولا، جالپى - 113
3.قىتاي - 29 التىن، 21 كۇمىس، 15 قولا، جالپى - 58
4.جاپونيا - 20 التىن، 19 كۇمىس، 28 قولا، جالپى - 66
5.ا ق ش - 18 التىن، 15 كۇمىس، 18 قولا، جالپى - 51
6.فرانسيا - 13 التىن، 9 كۇمىس، 8 قولا، جالپى - 30
7.يتاليا - 10 التىن، 14 كۇمىس، 17 قولا، جالپى - 41
8.يران - 7 التىن، 2 كۇمىس، 6 قولا، جالپى - 15
9.ۋكراينا - 6 التىن، 15 كۇمىس، 5 قولا، جالپى - 26
10.تايبەي - 6 التىن، 12 كۇمىس، 17 قولا، جالپى - 35
11.قازاقستان - 6 التىن، 0 كۇمىس، 4 قولا، جالپى - 10
اۆتور: كۇنسۇلتان وتارباي
