قىزىلوردالىقتار «قازاقستان بارىسى-2015» تۋرنيرىندە ارنايى جۇلدە العان نۇرىم سالىمگەرەيەۆكە كولىك مىنگىزدى
ۇلت كوشباسشىسى - قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ جۇلدەسى ءۇشىن وتكەن استاناداعى «قازاقستان بارىسى» V رەسپۋبليكالىق تۋرنيرىندە «كورەرمەن كوزايىمىنا» اينالعان نۇرىم سالىمگەرەيەۆتى ارالدىقتار زور قۇرمەتپەن كۇتىپ الدى.
اۋدان اكىمى ابزال مۇحيموۆتىڭ ءوزى پالۋاندى جەڭىسىمەن قۇتتىقتاپ، «قازاقستان بارىسى» تۋرنيرىنە نۇرىم العاش رەت قاتىسسا دا، جوعارى شەبەرلىكپەن ونەر كورسەتكەندىگىن، بوز كىلەم ۇستىندە ەشقانداي ەسكەرتپە الماي، وزىنەن تاجىريبەلى ءتىس قاققان پالۋاندارمەن باق سىناسقاندىعىن ەرەكشە اتاپ، بۇل ۇلكەن ەرلىك ەكەندىگىن ايتتى. اۋدان باسشىسى ارال حالقىنىڭ اتىنان نۇرىم سالىمگەرەيەۆكە سۋ جاڭا «نيۆا» اۆتوكولىگىنىڭ كىلتىن تابىستادى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.
نۇرىم «قازاقستان بارىسى-2015» سايىسىندا الدىمەن مەيرامبەك جاڭابايدان ايلاسىن اسىردى. ودان كەيىن ايبول ايتبەكتى ورتا جولدا قالدىرىپ كەتتى. جارىستىڭ كەلەسى ساتىسىندا بيىلعى بايگەنىڭ باس جۇلدەسىن قانجىعاعا بايلاعان بالۋان بەيبىت ىستىبايەۆپەن جولىعىپ، وعان جول بەرىپ قويدى. وسىعان قاراماستان ونىڭ جىگەرلى قيمىلىن بارشا جۇرت جوعارى باعالادى. استىنا ارنايى كولىك مىنگىزدى.
ماماندار نۇرىمنىڭ قابىلەتى مەن شەبەرلىگىن جوعارى باعالايدى. 2013-جىلى «جاس بارىس» رەسپۋبليكالىق تۋرنيرىنىڭ جەڭىمپازى نۇرىم سالىمگەرەيەۆ تۋرنيردىڭ فينالدىق كەزەڭىنە تۇڭعىش رەت قاتىستى. ول 1994-جىلى دۇنيەگە كەلگەن. بويى: 179 سانتيمەتر. سالماعى: 100 كەلى. ۇستىمىزدەگى جىلى وبلىستىق «التىن بەلبەۋ» باسەكەسىندە توپ جارىپ، «سىر بارىسى» اتاعىن الدى. قازاق كۇرەسىنەن ق ر سپورت شەبەرى بولعان. 2013-جىلعى «جاس بارىس» رەسپۋبليكالىق تۋرنيرىنىڭ جەڭىمپازى، 2013-جىلعى قازاق كۇرەسىنەن ق ر چەمپيونى، 2015-جىلعى قىزىلوردا وبلىستىق «التىن بەلبەۋ» جارىسىنىڭ جەڭىمپازى بولدى.
