بەس ءوڭىردىڭ «قازاقستان بارىسى» - 2015: تۋرنيرىنە قاتىساتىن بالۋاندار بەلگىلى بولدى

استانا. قازاقپارات - قازاق كۇرەسىنەن 5- شىلدە كۇنى استانادا ءداستۇرلى تۇردە ۇيىمداستىرىلىپ كەلە جاتقان «قازاقستان بارىسى» رەسپۋبليكالىق تۋرنيرىنىڭ فينالدىق كەزەڭىندە ونەر كورسەتەتىن تاعى بەس ءوڭىردىڭ بالۋاندارى بەلگىلى بولدى، دەپ جازادى «الاش ايناسى» ينتەرنەت- پورتالى.

بۇگىندە ەلىمىزدىڭ تۇكپىر-تۇكپىرىندە جارىستىڭ Ⅲ ىرىكتەۋ كەزەڭى وتۋدە. تۋرنيردىڭ رەسمي سايتى تاراتقان مالىمەتى بويىنشا، قازىردىڭ وزىندە بيىلعى دوداعا قاتىساتىن استانا، اقتوبە، اقمولا، باتىس قازاقستان جانە پاۆلودار قالالارى مەن وبلىستارىنىڭ اپايتوس بالۋاندارى بەلگىلى بولعان ەكەن.

پاۆلودار وبلىسى: ارمان ماحامبەتوۆ، الان تۇرىسوۆ

اقتوبە وبلىسى: باقتىباي قيسىكوۆ، شىڭعىس شوقپىتوۆ

باتىس قازاقستان وبلىسى: ەدىل ۇسەنوۆ، ولجاس سۇلەيمەنوۆ

استانا: عايني سەيدىلدايەۆ، ايبات سەيتەن

اقمولا وبلىسى: نۇرلان جامالوۆ، اسەت ءجۇنىسوۆ

ايتا كەتەيىك، 2015-جىلعى «قازاقستان بارىسى» تۋرنيرى قازاق حاندىعىنىڭ 550 جىلدىعى، قازاقستان حالقى اسسامبلەياسى 20 جىلدىعى مەن كونستيتۋتسيانىڭ 20 جىلدىعىنا ارنالىپ وتىر.

5-شىلدە كۇنى وتەتىن شەشۋشى كەزەڭدى «قازاقستان» جانە  «KazSport»رەسپۋبليكالىق تەلەارنالارى تۋرنيردەن تىكەلەي كورسەتىلىمدى تاراتاتىن بولادى.

ەستەرىڭىزگە سالا كەتەيىك، 2014-جىلعى «قازاقستان بارىسى» تۋرنيرىندە مۇحيت تۇرسىنوۆ جەڭىسكە جەتكەن. ال فينالدىق باسەكەدە جەڭىلگەن اسىل بارمەنوۆ «كۇمىس بەلبەۋ» يەگەرى اتانعان ەدى. تۋرنيردىڭ قورىتىندىسى بويىنشا 2014-جىلعى «قازاقستان بارىسى» مۇحيت تۇرسىنوۆ 150 مىڭ ا ق ش دوللارىن قانجىعاسىنا بايلاسا، ونىڭ باپكەرىنە 20 مىڭ ا ق ش دوللارى تابىستالعان-دى. «كۇمىس بەلبەۋ» يەگەرى اسىل بارمەنوۆ 30 مىڭ دوللار كولەمىندە سىيلىق السا، باپكەرى 10 مىڭ دوللارمەن ماراپاتتالعان.