سايلاۋ-2015: كانديدات ءا. قۇسايىنوۆ جامبىل وبلىسى جۇرتشىلىعىمەن كەزدەستى
كەزدەسۋ بارىسىندا ق ر پرەزيدەنتتىگىنە كانديدات ءوزىنىڭ سايلاۋالدى باعدارلاماسىن تانىستىردى.
ءابىلعازى قۇسايىنوۆ ءوز تۇعىرناماسىنىڭ باستى باعىتى - ەكولوگيا ماسەلەسىنە توقتالدى.
«بۇگىندە الەمدىك كۇن تارتىبىندە وزەكتى ماسەلەلەر كوپ، الايدا، ونىڭ ىشىندە ەڭ ماڭىزدىسى ەكولوگيالىق پروبلەما بولۋى كەرەك دەپ ەسەپتەيمىن»، - دەدى ول.
ءا. قۇسايىنوۆتىڭ پىكىرىنشە، عاسىرلار بويى ادامزاتتىڭ تۇرمىس- تىرشىلىگى قورشاعان ورتانى قۇلدىراتۋعا باعىتتالدى، ەگەر ونى قالپىنا كەلتىرۋدى قولعا الماساق، الەمگە ۇلكەن ءقاۋىپ ءتونىپ تۇر.
كانديداتتىڭ مالىمدەۋىنشە، اسىرەسە وزون قاباتىنىڭ جۇقارۋى، الەم مۇحيتتارىنىڭ لاستانۋى، جەر مەن توپىراقتىڭ قۇنارسىزدانۋى، بيولوگيالىق ارتۇرلىلىكتىڭ جۇتاڭدانۋى سىندى ەكولوگيالىق تۇيتكىلدەر وزەكتى بولىپ وتىر.
كەزدەسۋ بارىسىندا كانديدات ەكولوگيالىق احۋالدىڭ ناشارلاۋىنا قاتىستى دالەلدەر كەلتىرىپ ءوتتى. سوڭعى 40 جىلدا ءار ادام باسىنا شاققانداعى تۇشى سۋ مولشەرى 60%- عا ازايعان. الداعى 25 جىلدا اۋىزسۋ تاپشىلىعى تاعى ەكى ەسەگە ارتپاق.
جاھاندىق جىلىنۋ سالدارىنان الەمدىك مۇحيت دەڭگەيى ⅩⅩ عاسىردا 20 سانتيمەترگە كوتەرىلدى.
توپىراقتىڭ قۇنارسىزدانۋى سالدارىنان جىل سايىن الەمدىك اۋىلشارۋاشىلىق اينالىمىندا 7 ميلليونعا جۋىق قۇنارلى جەر جارامسىزدانىپ جاتىر. ونىڭ باستى سەبەبى، كۇن سايىن ارتىپ جاتقان ۋربانيزاتسيا، سۋ جانە جەل ەروزياسى، سونىمەن قاتار حيميالىق جانە فيزيكالىق قۇلدىراۋ.
اتموسفەرانىڭ شاڭ- توزاڭ جانە گازدى قالدىقتارمەن لاستانۋى ۇلكەن الاڭداۋشىلىق تۋدىرادى. ولار مينەرالدى وتىن مەن بيوماسسانىڭ ورتەنۋىنە، سونداي- اق تاۋ- كەن، قۇرىلىس پەن باسقا دا جەردە جۇرگىزىلىپ جاتقان جۇمىستارعا بايلانىستى اۋاعا تارالۋدا.
21 - عاسىردا ادامزات الدىندا ەكولوگيانىڭ ەڭ باستى ماسەلەلەرىن شەشىپ، جەر شارىنىڭ ەكوجۇيەسىن كەيىنگى ۇرپاققا امان جەتكىزۋ مىندەتى تۇر.
«ەكولوگيالىق قاۋىپسىزدىك ماسەلەسىن ەكونوميكانى ەكولوگيالاندىرماي شەشۋ مۇمكىن ەمەس. ول ءۇشىن تابيعاتتى پايدالانۋدىڭ ەكونوميكالىق پروتسەستەرىن جەتىلدىرۋ قاجەت.
اسىرەسە ەكولوگيالىق ساياساتتى جەتىلدىرۋ جانە ەكولوگيالىق دامۋعا كەزەڭ- كەزەڭمەن وتۋدە ازاماتتىق قوعامنىڭ رولىنە ۇلكەن ءمان بەرىلۋى ءتيىس.
اتاپ ايتقاندا، ەكونوميكانى ەكولوگيالىق تازا، از شىعىندى تەحنولوگيالارعا كوشىرىپ، قورشاعان ورتانى قورعاۋ ەكونوميكالىق ءوسىمنىڭ باستى قاينار كوزىنە اينالۋى ءتيىس» ، - دەپ اتاپ ءوتتى قر پرەزيدەنتتىگىنە كانديدات.
الداعى ۋاقىتتا الەمنىڭ الدىڭعى قاتارلى ەلدەرى جاڭا عىلىمي يدەيالار مەن جاڭالىقتارعا، جاھاندىق الدىڭعى قاتارلى تەحنولوگيالارعا، بيوتەحنولوگيالارعا نەگىزدەلگەن تەحنولوگيالىق بازا قالىپتاستىرۋعا كىرىسەدى.
كانديداتتىڭ سايلاۋالدى تۇعىرناماسىنىڭ نەگىزگى تەتىكتەرىن قوزعاعان سايلاۋالدى شتابتىڭ جەتەكشىسى رۇستەم جولامان ونەركاسىپتىك قاۋىپسىزدىك ماسەلەسىنە دە توقتالىپ ءوتتى.
«تابيعات رەسۋرستارىن ءتيىمدى ءارى جوسپارلى پايدالانۋ، قورشاعان ورتانى لاستانۋدان قورعاۋ، تابيعي رەسۋرستاردى ءتيىمدى تۇتىنۋ، قورعاۋ جانە قالپىنا كەلتىرۋ ءبىزدىڭ ەڭ نەگىزگى مىندەتىمىزگە اينالۋى كەرەك»، - دەپ اتاپ ءوتتى ر. جولامان.
كانديدات ءىرى ونەركاسىپ وشاقتارى ءوز قىزمەتىن تەحنوگەندىك اپاتتار قاۋپى تۋىندامايتىنداي ەتىپ جۇرگىزۋگە مىندەتتى دەگەن پىكىرىمەن ءبولىستى.
مۇنداي اپاتتار الەم بويىنشا تالاي ادامنىڭ ءومىرىن قيىپ، وسكەلەڭ ۇرپاقتىڭ دەنساۋلىعىنا كەرى اسەرىن تيگىزدى. ەندى قاۋىپتى قالدىقتاردى اۋاعا شىعارۋعا، جارىلىستار جاساۋعا جول بەرمەي، جالپى، ءوندىرىستىڭ ادام دەنساۋلىعى مەن قورشاعان ورتاعا تيگىزەر جاعىمسىز ىقپالىن مەيىلىنشە ازايتۋ ماڭىزدى.
ازىق- تۇلىك پەن ءوندىرىستىڭ قاۋىپسىزدىگىن قامتاماسىز ەتۋ ماقساتىندا كاسىپورىنداردىڭ جۇمىسىنا قوعامدىق باقىلاۋ ورناتۋ قاجەت.
«قۇرىلىس، ونەركاسىپتىك ءوندىرىس، ءتىپتى، كەز كەلگەن شارۋاشىلىقتى جۇرگىزۋدە تابيعاتتىڭ بايلىعى، قورشاعان ورتا زيان شەكپەيتىندەي جوعارى تەحنولوگيالىق دارەجەگە قول جەتكىزۋ كەرەك دەپ ەسەپتەيمىن» ، - دەدى كانديدات.
