سايلاۋ-2015: پرەزيدەنتتىككە ۇمىتكەر ءا. قۇسايىنوۆتىڭ ايماقتىق شتابتارى سايلاۋشىلارمەن بەلسەندى جۇمىس جۇرگىزۋدە

استانا. قازاقپارات - قازاقستان رەسپۋبليكاسى پرەزيدەنتتىگىنە كانديدات ءابىلعازى قۇسايىنوۆتىڭ وڭتۇستىك قازاقستان جانە اقتوبە وبلىستارىنداعى سەنىمدى تۇلعالارى ونىڭ سايلاۋالدى تۇعىرناماسى تۋرالى ءتۇسىندىرۋ جۇمىستارىن جۇرگىزىپ، ۇگىت ماتەريالدارىن تاراتۋمەن اينالىسادى.

وڭتۇستىك قازاقستان وبلىسىندا 19 سەنىمدى تۇلعا بار. ونىڭ ءبارى الداعى سايلاۋ جۇمىستارىنا قىزۋ دايىندالىپ جاتىر. ۇگىت- ناسيحات ماتەريالدارىن تاراتىپ، پلاكاتتار مەن ءۇنپاراقتاردى ءىلىپ، اۋىلدى جەرلەردە بيلبوردتار ورناتۋدا.

تاعى ءبىر ماسەلە - كانديداتتىڭ سايلاۋالدى تۇعىرناماسىن ناسيحاتتاۋ. بەلسەندىلەر ۇگىت- ناسيحات ناۋقانىنىڭ زاڭعا سايكەستىگىن قاتاڭ باقىلاۋدا ۇستايدى.

ق ر پرەزيدەنتتىگىنە ۇمىتكەر ءابىلعازى قۇسايىنوۆتىڭ سەنىمدى تۇلعاسى ايگۇل بەكبوسىننىڭ ايتۋىنشا، شتابتا ۇگىت- ناسيحات جۇمىستارى قىزۋ ءجۇرىپ جاتىر.

شىمكەنت قالاسىندا 2 بيلبورد ورناتىلدى. جەرگىلىكتى اتقارۋ ورگاندارى بەلگىلەپ بەرگەن اۋداندار مەن قالالاردا ۇگىت- ناسيحات ماتەريالدارى، پلاكاتتار ءىلىنىپ جاتىر.

كانديداتتىڭ اقتوبە وبلىسىنداعى سايلاۋالدى شتابىندا 16 سەنىمدى تۇلعا جۇمىس ىستەيدى. ونىڭ ۇشەۋى اقتوبە قالاسىندا، قالعاندارى اۋداندار بويىنشا بەلسەندى ۇگىت جۇمىستارىن جۇرگىزۋدە.

قالادا ارنايى بولىنگەن جەرلەرگە كانديداتتىڭ سايلاۋالدى تۇعىرناماسى جازىلعان 2,5 مىڭ باعدارلاما ءىلىندى. تۇرعىندار اراسىندا 150 ءۇنپاراق تاراتىلدى. سونداي-اق وبلىستىڭ ءبىرقاتار اۋداندارىنا ۇگىت ماتەريالدارىن جەتكىزۋ جۇمىستارى جۇرگىزىلۋدە.

ق ر پرەزيدەنتتىگىنە ۇمىتكەر ءا. قۇسايىنوۆتىڭ ايماقتىق شتابىنىڭ وكىلى ن. دۋليا اتاپ وتكەندەي، قىزمەتكەرلەر بارلىق ءتيىستى جۇمىستاردى ورىنداپ جاتىر. ياعني، اقتوبەدە قاجەتتى اقپاراتتىڭ ءبارى قولجەتىمدى.

 جالپى العاندا، ق ر پرەزيدەنتتىگىنە ۇمىتكەر ءا. قۇسايىنوۆتىڭ سايلاۋالدى شتابتارىندا جۇمىس جوسپارعا ساي ءجۇرىپ جاتىر.