سايلاۋ-2015: پرەزيدەنتتىككە كانديدات ءا. قۇسايىنوۆ و ق و جۇرتشىلىعىمەن كەزدەستى
كەزدەسۋ بارىسىندا ءابىلعازى قۇسايىنوۆ جيىن قاتىسۋشىلارىن ەكولوگيا سالاسىنا نەگىزدەلگەن ءوز سايلاۋالدى باعدارلاماسىنىڭ باستى باعىتتارىمەن تانىستىردى.
ءا. قۇسايىنوۆ جيىنعا قاتىسۋشىلارعا جاھاندىق ەكولوگيالىق قىزمەتتىڭ نەگىزگى ۆەكتورلارى تۋرالى بايانداپ، تابيعاتتى قورعاۋ ماسەلەسىندە عىلىمنىڭ ماڭىزىنا ەرەكشە توقتالدى.
ونىڭ ايتۋىنشا، بۇل - ەكولوگيالىق قاۋىپسىزدىك، كليمات پەن سۋ رەسۋرستارىن، «جاسىل» تەحنولوگيانى زەرتتەۋ جۇمىستارىن قوسا العاندا، ءبىرتالاي مىندەتتەر كەشەنىن قامتيتىن ماڭىزدى ماقسات.
كانديداتتىڭ ايتۋىنشا، الەمدە كۇنى بۇگىنگە دەيىن ەكولوگيالىق پروبلەمالارعا ءتيىستى نازار بولىنبەي كەلەدى. حالىقارالىق قاۋىمداستىقتار مەن مامانداندىرىلعان ۇيىمداردىڭ اتقارىپ جاتقان ەكولوگيالىق جۇمىستارى كونفەرەنتسيا، تالقىلاۋلار، شەشىمى جوق داۋلارمەن عانا شەكتەلىپ وتىر.
ال الەمدە تابيعات قويناۋىن ءتيىمسىز پايدالانۋ، تابيعات اياسىنىڭ لاستانۋى، گەندىك قور مەن بيولوگيالىق ارتۇرلىلىكتىڭ ازايۋى توپىراقتىڭ قۇنارسىزدانىپ، سۋدىڭ لاستانۋىنا، جالپى، قورشاعان ورتانىڭ قۇلدىراۋىنا الىپ كەلۋدە.
سونداي-اق، كانديدات الەمدىك ونەركاسىپتىڭ قارقىنىمەن ارتىپ وتىرعان تەحنوگەندىك اپاتتاردىڭ الدىن الۋ ماسەلەسىنە جەكە توقتالىپ ءوتتى.
ادام ءىس- ارەكەتىنىڭ تابيعاتقا كەلتىرگەن ەڭ ۇلكەن زالالى - جاھاندىق جىلىنۋ. بۇل پارنيكتىك اسەر تۋدىرىپ وتىر.
«الەمنىڭ عالىمدارى دابىل قاعۋدا. 21 -عاسىردا، ەڭ از دەگەندە، تەمپەراتۋرانىڭ ورتاشا جىلىنۋ دەڭگەيى 3 گرادۋسقا جەتۋى مۇمكىن. مۇنىڭ ءوزى - تابيعاتقا اسا ۇلكەن قاۋىپ توندىرەتىن وزگەرىس.
ءبىراق، ەگەر ءقاۋىپتى گازداردىڭ اتموسفەراعا تارالۋى توقتاتىلماسا، بۇگىنگى وزگەرىس بۇدان دا قورقىنىشتى قۇبىلىسقا ۇلاسۋى مۇمكىن. اتالمىش بولجامعا سەنسەك، جاھاندىق جىلىنۋ دەڭگەيى 6,5 گرادۋسقا جەتەدى! بۇل الىس بولاشاقتا ەمەس، ەرتەڭگى كۇندەرى-اق ورىن الۋى مۇمكىن ۇلكەن ءقاۋىپ. ءدال وسى ماسەلەگە قوعام نازارىن اۋدارتقىم كەلەدى»، - دەدى ءا. قۇسايىنوۆ.
تۇعىرناماسىمەن تانىستىرعان كانديدات قازىرگى زاماندا ادامدار جاڭارتىلمايتىن تابيعي رەسۋرستاردى شەكسىز تۇتىنا وتىرىپ، قالپىنا كەلتىرۋگە بولاتىن قورلاردىڭ قايتا تولىسۋىنا كەدەرگى جاساۋدا دەگەن پىكىرىن جەتكىزدى.
ادامزات تابيعات دامۋىن جاعىمسىز باعىتقا بۇرىپ بارادى. بۇل بيولوگيالىق جانە الەۋمەتتىك فەنومەن رەتىندە ونىڭ فيزيكالىق جانە رۋحاني دامۋىنا نۇسقان كەلتىرۋى ىقتيمال. قورشاعان ورتانىڭ لاستانۋى كۇن سايىن وزەكتى ءارى كۇردەلى ماسەلەگە اينالىپ بارادى.
بۇگىننىڭ وزىندە جەر شارىن مەكەندەگەن 7 ميلليارد ادامعا قاجەتتى قۇنارلى جەردىڭ تاپشىلىعى 6 گەكتاردان اسادى. بۇل كورسەتكىش جاھاندىق جىلىنۋعا بايلانىستى بۇدان بەتەر ناشارلاي بەرمەك.
«ءبىز الەم بويىنشا ەكولوگيا ءار ادامنىڭ دامۋى ءۇشىن قاجەتتى تولىققاندى عىلىم رەتىندە قاراستىرىلۋىن قالايمىز. ول - تەك تابيعات تۋرالى ەمەس، ەڭ الدىمەن، ءبىزدىڭ ءومىرىمىز جايلى عىلىم»، - دەدى كانديدات.
وسى كەزدەسۋگە قاتىسقان كانديداتتىڭ ايماقتىق شتابىنىڭ جەتەكشىسى بولات رىسقۇلبەكوۆ ەكولوگيالىق ماسەلەنىڭ وزەكتىلىگىنە توقتالدى.
«كانديداتىمىزدىڭ سايلاۋالدى باعدارلاماسى ەكولوگيا ماسەلەسىنە نەگىزدەلگەن. بۇل الەمدەگى ەڭ وزەكتى تاقىرىپتاردىڭ ءبىرى. الەمدەگى بيوبالانستى، تابيعات تازالىعى مەن ونەركاسىپ قاۋىپسىزدىگىن ساقتاۋ ماسەلەسى بۇعان دەيىن دە وزەكتى بولعان. ءبىراق، سوڭعى ۋاقىتتا ونىڭ اۋقىمى جاھاندىق دەڭگەيگە جەتتى»، - دەدى ب. رىسقۇلبەكوۆ.
ءبىز قوعام نازارىن حالىقارالىق ەكولوگيالىق ماسەلەلەرگە اۋدارتىپ، ول تەك ءسوز جۇزىندە عانا ەمەس، بارلىق مەملەكەتتەردىڭ كەلىسىلگەن ۇستانىمىمەن ناقتى قولداۋ كورسەتۋدى قاجەت ەتەتىن شەشىمىن كۇتتىرمەيتىن تۇيتكىل ەكەنىن كورسەتكىمىز كەلەدى»، - دەدى ر. جولامان.
كەزدەسۋدى قورىتىندىلاي كەلە، ءابىلعازى قۇسايىنوۆ جيىنعا قاتىسۋشىلاردى جاھاندىق ەكولوگيالىق ماسەلەلەرگە شىنايى كوڭىل بولۋگە شاقىردى.
«ءار وتكىزگەن كەزدەسۋىمدە قايتالايتىنىم، تابيعات - ادامنىڭ ەڭ باستى بايلىعى. ونى ايالاپ، ءوز قولىمىزبەن وعان زيانىن تيگىزۋى مۇمكىن وزگەرىستەردەن، لاستانۋدان، جاعىمسىز تەحنولوگيالىق ىقپالداردان قورعاۋىمىز كەرەك»، - دەدى ءا. قۇسايىنوۆ.
