16:58, 06 - ءساۋىر 2015 | GMT +6
سايلاۋ-2015: كونستيتۋتسيالىق كەڭەستىڭ ءتوراعاسى ق ر پرەزيدەنتىن سايلاۋدى بايقاۋ جونىندەگى ە ق ى ۇ/د ي ا ق ب- نىڭ ميسسياسىن قابىلدادى
استانا. قازاقپارات - كونستيتۋتسيالىق كەڭەستىڭ ءتوراعاسى ي. ي. روگوۆ قازاقستان رەسپۋبليكاسىنىڭ پرەزيدەنتىن سايلاۋدى بايقاۋ جونىندەگى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ دەموكراتيالىق ينستيتۋتتار مەن ادام قۇقىقتارى جونىندەگى بيۋروسى (ە ق ى ۇ/د ي ا ق ب) ميسسياسىن قابىلدادى.
بۇل تۋرالى قازاقستان رەسپۋبليكاسى كونستيتۋتسيالىق كەڭەسىنىڭ باسپا ءسوز قىزمەتى حابارلادى.
كەزدەسۋ بارىسىندا ي. ي. روگوۆ ەل باسشىلىعى الداعى پرەزيدەنتتىك سايلاۋدىڭ كونستيتۋتسياعا جانە حالىقارالىق ستاندارتتارعا سايكەس ءادىل، ايقىن جانە اشىق وتۋىنە اسا ءمان بەرەتىنىن اتاپ ءوتتى.
ە ق ى ۇ ميسسياسىنىڭ وكىلدەرى ەلىمىزدىڭ سايلاۋ قۇقىعى سالاسىنداعى مەملەكەتتىك قۇقىقتىق ساياساتىنىڭ باستى باعىتتارى تۋرالى، كونستيتۋتسيالىق كەڭەستىڭ اتا زاڭ ۇستەمدىگىن قامتاماسىز ەتۋدەگى قىزمەتى، سونداي-اق سايلاۋ ۇدەرىسىندەگى وكىلەتتىلىگى تۋرالى جانە سايلاۋ زاڭناماسىنا قاتىستى شەشىمدەرى جونىندە حاباردار بولدى.
