قازاقستاندا قوڭىر كومىردەن وتىندى تاجىريبەلىك ءوندىرۋ 2015 - جىلدىڭ ساۋىرىندە باستالادى - ق ر ب ع م
بۇل تۋرالى ق ر ءبىلىم جانە عىلىم مينيسترلىگى جانىنداعى تەحنولوگيالاردى كوممەرتسيالاندىرۋ ورتالىعىنىڭ باس ديرەكتورى دامير ەگىزبايەۆ ورتالىق كوممۋنيكاتسيالار قىزمەتىندە وتكەن بريفينگتە حابارلاعان، دەپ جازادى ق ر پرەمەر- ءمينيسترىنىڭ سايتىندا.
«2015 - جىلدىڭ ءساۋىر ايىندا ەرەيمەنتاۋ جانىنداعى سارى ادىر كومىر كەنىشىندە قۋاتتىلىعى تاۋلىگىنە 0,8 توننانى قۇرايتىن تاجىريبەلىك- ەكسپەريمەنتتىك كەشەن قۇرىلادى، وسى رەتتە سۇيىق وتىننىڭ قۇنى 1 ليترىنە 42 تەڭگەنى قۇرايدى»، - دەدى د. ەگىزبايەۆ.
ونىڭ ايتۋىنشا، جوبانى 2013 - جىلدان بەرى كومىر حيمياسى جانە تەحنولوگيالار ينستيتۋتى ىسكە اسىرۋدا. الەۋەتتى ينۆەستور دا تابىلعان، ول جوبانى ءساتتى جۇزەگە اسىرعان جاعدايدا زاۋىت سالۋعا 1 ميلليونعا جۋىق دوللار سالۋعا دايىن.
«كومىردى ديزەلدى وتىن مەن جانارمايعا قايتا وڭدەۋ ۇدەرىسى دۇنيە ءجۇزى ماماندارىمەن دايىندالعان، الايدا قازاقستاندىق عالىمدار بۇل تەحنولوگيانى وتاندىق قوڭىر كومىر ەرەكشەلىكتەرىنە سايكەس بەيىمدەندىرە الدى، سونداي- اق تەحنولوگيالىق ۇدەرىستى شاپشاڭداتىپ جانە وتىن باعاسىن تومەندەتە الدى»، - دەپ باسا ايتتى ورتالىق باسشىسى.
سونداي- اق ورتالىقتىڭ قولداۋىمەن D3- پرينتەرلەردىڭ ءوندىرىسى بويىنشا جوبا جۇزەگە اسىرىلادى. جاساۋشىلار ەنەرگەتيكادا وقشاۋلاۋ ماتەريالدارىن ءوندىرۋ ءۇشىن پايدالانىلاتىن جابدىقتى جەتكىزۋ بويىنشا العاشقى كەلىسىمشارتىن جاساپ ۇلگەردى.
«ەلىمىزدە وسى جوبانى جۇزەگە اسىرۋشىلار سەرۆيستى دە قوسا جۇزەگە اسىرۋدى ۇسىنۋدا، ياعني ءوندىرىستى، وقىتۋدى، تەحنيكالىق قىزمەت كورسەتۋ مەن باعدارلامالىق قامتاماسىز ەتۋ دە قامتىلاتىن بولادى»، - دەپ باسا ايتتى د. ەگىزبايەۆ.
سونىمەن بىرگە نارىقتاعى قۇرىلعىلارعا قاراعاندا ونىڭ باعاسى 20-30 پايىزعا ارزان بولادى. ءونىمنىڭ نەگىزگى پايدالانۋشىلارى ستوماتولوگيالار، وقۋ مەكەمەلەرى، ارحيتەكتۋرالىق- قۇرىلىس كومپانيالارى بولادى دەپ كۇتىلۋدە.
