ءا. جاقسىبەكوۆ استاناعا 2015 - جىلى بيۋدجەتتەن قانشا اقشا بولىنەتىنىن مالىمدەدى
بۇگىن استانا قالالىق مەملەكەتتىك كىرىستەر دەپارتامەنتى ۇجىمىمەن كەزدەسكەن ەلوردا اكىمى ادىلبەك جاقسىبەكوۆ وسىلاي دەدى.
«2015 - جىلى قالالىق بيۋدجەت 335 ميلليارد تەڭگەنى قۇرايدى.
جەكە تابىس 20 پايىزدىق وسىممەن 160,8 ميلليارد تەڭگەدەن استام كولەمدە بەكىتىلدى. ونىڭ 90 پايىزعا جۋىعىن سالىق تۇسىمدەرى قۇرايدى»، - دەدى ەلوردا باسشىسى.
ونىڭ اتاپ وتۋىنشە، ەلوردانىڭ ەكونوميكالىق دامۋىنىڭ ماڭىزدى كەزەڭدەرىنىڭ ءبىرى - ونىڭ ءوزىن- ءوزى قامتاماسىز ەتۋ دەڭگەيىنە شىعۋى. ماسەلەن، 2014 - جىلعى 1 - جەلتوقسان جاعدايى بويىنشا استانانىڭ مەملەكەتتىك بيۋدجەت كىرىسى دەپارتامەنتىنىڭ جەلىسى بويىنشا مەملەكەتتىك بيۋدجەتكە ءتۇسىم 662,1 ميلليارد تەڭگەدەن استى.
ونىڭ ىشىندە رەسپۋبليكالىق بيۋدجەتكە 513,7 ميلليارد تەڭگە، ال جەرگىلىكتى بيۋدجەتكە 145,5 ميلليارد تەڭگەگە جۋىق قارجى اۋدارىلدى.
«بۇعان قوسا، قالا بيۋدجەتىن بولىنەتىن ترانسفەرتتەر مەن كرەديتتەرگە تاۋەكەلىن تومەندەتۋگە باعىتتالعان جۇمىستار جۇرگىزىلۋدە»، - دەدى ءا. جاقسىبەكوۆ.
اۆتور: مارلان جيەمباي
