سايلاۋ -2015: سەنىڭ داۋىسىڭ - سەنىڭ بولاشاعىڭ!» پوستەرلەر بايقاۋىنا 600 گە جۋىق جۇمىس جىبەرىلدى

استانا. قازاقپارات - «سەنىڭ داۋىسىڭ - سەنىڭ بولاشاعىڭ!» اتتى بايقاۋعا كەلىپ تۇسكەن جۇمىستاردىڭ كورمەسى وتەدى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە «قالامگەر - ازامات» جاس جۋرناليستەر قوعامدىق قورىنىڭ ءتوراعاسى ايدار قىرىقپاي ءمالىم ەتتى.

«مەنىڭ ويىمشا، كەزەكتەن تىس پرەزيدەنتتىك سايلاۋ ءاربىر قازاقستاندىق ءۇشىن ۇلكەن مەرەكە بولۋى كەرەك. ويتكەنى، ءبىز ءوزىمىزدىڭ بولاشاعىمىز ءۇشىن داۋىس بەرەمىز. وسى تۇرعىدا جاستاردى، بارشا قازاقستاندىقتاردى وزدەرىنىڭ ازاماتتىق كوزقاراسىن ءبىلدىرۋ ماقساتىندا، قىزىقتىرۋ باعىتىندا «سەنىڭ داۋىسىڭ - سەنىڭ بولاشاعىڭ!» اتتى بايقاۋدى ۇيىمداستىرۋدى ءجون كوردىك»، - دەدى ول.

 ايتا كەتەيىك، بايقاۋ 17 -ناۋرىزدا جاريالاندى. وسى كۇنگە دەيىن بۇل شاراعا وراي 600 گە جۋىق جۇمىس ۇسىنىلعان ەكەن.

«كۇن سايىن قاتىسۋعا نيەتتىلەردىڭ سانى ارتىپ كەلەدى. جۇمىستاردى ۇسىنعان جاستاردىڭ كوزقاراستارى وتە مىقتى، ەلىمىزدىڭ سيمۆولدارىنا، قۇندىلىقتارىنا بايلانىستى وتە جاقسى پوستەرلەر سالىپ جاتىر»، - دەدى ا. قىرىقپاي.

بەلگىلى بولعانداي، اۆتورلاردىڭ كوپشىلىگى 18-29 جاس ارالىعىنداعىلار. بايقاۋدىڭ ەڭ جاس قاتىسۋشىسى رەتىندە قازاق ۇلتتىق ونەر ۋنيۆەرسيتەتىنىڭ جانىنداعى مەكتەپتىڭ وقۋشىسى 14 جاسار شۇعىلا ماحامبەت تىركەلدى.

 بايقاۋعا جۇمىستاردى قابىلداۋ 15 -ساۋىردە اياقتالادى. ۇزدىك شىققان جۇمىستاردى قازىلار القاسى ىرىكتەپ، الماتىدا 20 -ساۋىردە سالتاناتتى تۇردە ماراپاتتاۋ ءراسىمى وتەدى. «بايقاۋدىڭ ماقساتى - وزىندىك شەبەرلىگىمەن كوزگە تۇسكەن جاستاردى حالىققا تانىتۋ. وسى ورايدا بايقاۋ قورىتىندىسى شىققاننان كەيىن كەلەسى كۇنى الماتىدا ۇسىنىلعان جۇمىستاردىڭ بارلىعىن كورمەدە كوپشىلىك نازارىنا ۇسىنۋدى جوسپارلاپ وتىرمىز»، - دەدى ول.

بۇل بايقاۋ «Sailau2015.el.kz» ارنايى تۇعىرناماسى اياسىندا «El.kz» الەۋمەتتىك جەلىسىنىڭ بازاسىندا ءوتىپ جاتىر. قازىرگى كەزدە پوستەرلەردىڭ باسىم بولىگى الماتى، اقمولا جانە باتىس قازاقستان وبلىستارىنان كەلىپ ءتۇستى.

اۆتور: رۋسلان عابباسوۆ