ءماجىلىس 2015-2017 - جىلدارعا ارنالعان رەسپۋبليكالىق بيۋدجەتكە ەنگىزىلگەن وزگەرىستەردى ماقۇلدادى
رەسپۋبليكالىق بيۋدجەتتى ناقتىلاۋعا نەگىز بولعان بولجامدارعا سايكەس، جالپى ىشكى ءونىمنىڭ ءوسۋى 2015 - جىلى 1,5 پايىز دەڭگەيىندە باعالانادى. ال مۇناي باعاسىن بولجامداۋ دەڭگەيى 2015-2017 - جىلدارى باررەلىنە 80 دوللاردان 50 دوللارعا دەيىن، 2018-2019 - جىلدارى باررەلىنە 60 دوللارعا تومەندەيدى دەپ جوسپارلانادى.
بۇدان بولەك، ۇلتتىق بانكتىڭ بولجامى بويىنشا ەكسپورت كولەمى 2015 -جىلى 44,7 پايىزعا، يمپورت 21,8 پايىز پايىزعا تومەندەيدى. ينفلياتسيا دەڭگەيى بۇدان بۇرىنعى 6-8 پايىز دالىزىندە ساقتالادى.
بۇدان بولەك، بيۋدجەتتىڭ تەڭگەرىمدىلىگىن قامتاماسىز ەتۋ ماقساتىندا، ناقتىلاۋ 686,7 ميلليارد تەڭگەگە شىعىستاردى وڭتايلاندىرۋدى جانە 259,4 ميلليارد تەڭگەگە بيۋدجەت تاپشىلىعىن ۇلعايتۋدى كوزدەيدى.
سونىمەن قاتار، ۇلتتىق قوردان نىسانالى ترانسفەرت «نۇرلى جول» باعدارلاماسىنا تۇزەتۋ ەنگىزىلۋىنە بايلانىستى 76,0 ميلليارد تەڭگەگە ۇلعايتىلعان. بۇل رەتتە 2015 - جىلى ىسكە اسىرىلۋى باستالاتىن بارلىق جاڭا جوبالار مەن باعدارلامالار، ونىڭ ىشىندە ىسكە اسىرۋ مەرزىمى 2016 - جىلعا كوشىرىلگەن الەۋمەتتىك سالادا جاڭا باستامالار، شىعىندىلىعى جوعارى جالعاساتىن جانە ىسكە اسىرىلۋى ۇزاق جالعاساتىن جوبالار، سونداي-اق ىسكە اسىرۋ بويىنشا نەگىزگى جۇكتەمەنى 2016 - جىلعا اۋىستىرۋ ۇسىنىلعان جوبالار، تيىمدىلىگى تومەن نەمەسە راستالماعان تيىمدىلىگى انىقتالعان شىعىستاردىڭ باعىتتارى مەن باعدارلامالارى 2015 - جىلعى بيۋدجەتتىك شىعىستاردى وڭتايلاندىرۋدىڭ نەگىزگى باعىتتارى بولىپ تابىلادى.
ناتيجەسىندە، تۇسىمدەر - 870,0 ميلليارد تەڭگەگە ازايتا وتىرىپ، 5 988,0 ميلليارد تەڭگەنى قۇرايدى. شىعىستار - بەكىتىلگەن بيۋدجەتپەن سالىستىرعاندا 610,7 ميلليارد تەڭگەگە تومەندەي وتىرىپ، 7244,5 ميلليارد تەڭگە سوماسىندا قالىپتاستىرىلادى.
اۆتور: قانات مامەتقازى ۇلى
