ميلان ەكسپو-2015: قازاقستاننىڭ ۇلتتىق پاۆيلونىن ءبىر ايدا 130 مىڭ ادام تاماشالادى
بۇل تۋرالى دۇنيەجۇزىلىك كورمەسىندەگى قازاقستان رەسپۋبليكاسى ۇلتتىق سەكتسياسىنىڭ باس كوميسسارى انۋاربەك مۋسين ءمالىم ەتتى.
«ءبىزدىڭ پاۆيلوننىڭ تانىمالدىعى جوعارى بولىپ تۇر. كۇن سايىن ءبىزدىڭ پاۆيلونعا بەس مىڭعا دەيىن قوناق كەلەدى. ءدال وسىنداي قارقىن جالعاسا بەرسە، پاۆيلونىمىزدى كورۋگە كەلەتىن قوناقتاردىڭ لەگى مول بولادى دەپ كۇتۋدەمىز. كورمە جۇمىس ىستەي باستاعان ساتتەن ءبىر اي ىشىندە 130 مىڭ ادام ءبىزدىڭ پاۆيلوندى تاماشالادى» ، دەدى ول.
ونىڭ اتاپ وتۋىنشە، شەتەلدىكتەر تارابىنان مۇنداي قىزىعۋشىلىقتىڭ زور بولۋىنا كەلەسى ەكسپو كورمەسىنىڭ قازاقستان ەلورداسى استانادا وتەتىندىگى دە ءوز سەپتىگىن تيگىزۋدە.
«ارينە، كەلەسى كورمەنى قابىلدايتىن ەل بولعاندىقتان بۇل جەردە بىزگە ءجىتى نازار اۋدارىپ جاتىر. ءبىزدى كورۋدە، ءتىپتى، بەلگىلى ءبىر دارەجەدە باعالاپ تا جاتىر دەسەك بولادى. سوندىقتان، ءبىز جوعارى دەڭگەيدە ءوز جەتىستىگىمىزدى پاش ەتۋگە ءتيىسپىز. ياعني، ءبىز ەكسپو-2017 كورمەسىنىڭ مارتەبەسىن اسقاقتاتۋىمىز قاجەت» ، - دەدى ءا. مۋسين.
ايتا كەتەيىك، بۇگىن ەلباسى ن. نازاربايەۆتىڭ قاتىسۋىمەن ميلانداعى ەكسپو كورمەسىندە قازاقستاننىڭ ۇلتتىق كۇنى وتەدى. سونىمەن قاتار، وسى كۇنى قازاقستان مەن يتاليا باسشىلارىنىڭ قاتىسۋىمەن بيزنەس فورۋم وتكىزۋ جوسپارلانعان. ونىڭ اياسىندا جالپى سوماسى بەس ءجۇز ميلليون دوللاردى قۇرايتىن جيىرماعا جۋىق كەلىسىمگە قول قويىلماق.
اۆتور: مارلان جيەمباي 
