ينچحون-2014: قازاقستاندىق بوكسشى ءىلياس سۇلەيمەنوۆ العاشقى قارسىلاسىن ايقىن باسىمدىقپەن جەڭدى

الماتى. قازاقپارات - بۇگىن وڭتۇستىك كورەيانىڭ ينچحون قالاسىندا ءوتىپ جاتقان 17- ازيا ويىندارىندا بوكس سايىستارىنىڭ ەكىنشى كۇنى باستالدى.

  قازاقستاندىق بىلعارى قولعاپ شەبەرى ءىلياس سۇلەيمەنوۆ (52 ك گ) شارشى الاڭدا تايلاندىق بوكسشى چاتچاي باتديمەن كەزدەسىپ، ونى 3:0 ەسەبىمەن ايقىن باسىمدىقپەن جەڭدى، دەپ حابارلادى قازاقستاننىڭ بوكس فەدەراتسياسىنان.

ەندى ءىلياس 27 - قىركۇيەك كۇنى كەشكى سەسسيادا 1/8 فينالدا يندونەزيالىق بوكسشى حۋليو بريامەن كەزدەسەدى.

 ال ەرتەڭ، بوكس سايىستارىنىڭ ءۇشىنشى كۇنى 1/8 فينالدا قازاقستاندىق بوكسشىلار قايرات ەراليەۆ (56 ك گ) كاتارلىق دجوماح اربابيمەن، ادىلبەك نيازىمبەتوۆ (81 ك گ) سيريالىق ەلدين گوسسۋنمەن، ال انتون پينچۋك (91 ك گ. دەيىن) قىرعىزستاندىق سەرگەي پارەنكومەن قولعاپ تۇيىستىرەدى.

اۆتور: جاپپاربەرگەن ايبوتا