ءاچ-2014: يسپانيا نەگە جەڭىلدى؟

استانا. قازاقپارات - كەشە تۇندە الەمنىڭ ەڭ ازۋلى كومانداسى اتانعان يسپانيا چەمپيوندىق تاجىمەن قوش ايتىستى.
None
None

سوڭعى التى جىل بويى ەشكىمگە جۇلدە ۇستاتپاي كەلە جاتقان يكەر كاسيلياس پەن ونىڭ وتانداستارى جەڭىستى جولدان اداسىپ، الدىمەن گوللانديادان (1:5) ، سودان سوڭ چيليدەن (0:2) وڭباي ۇتىلدى.

يسپانياعا نە بولدى؟

بۇل سۇراق ءقازىر بارلىق جانكۇيەرلەردى مازالاپ جۇرگەنى انىق. قۇرامى جاعىنان وسال تۇسى كورىنبەيدى، ءار شەپتە سايدىڭ تاسىنداي ىرىكتەلگەن، ەڭ تاڭداۋلى فۋتبولشىلار جينالعان. بۇل ويىنشىلار جەڭبەگەن جارىس، باعىندىرماعان قامال قالمادى.

ءبىراق ۆيسەنتە دەل بوسكە ولاردىڭ قارتايعانىن ەسكەرمەگەن سەكىلدى. كاسيلياس، حاۆي، ينەستا، ۆيليا، توررەس وردا بۇزار شاقتان اسىپ بارادى.

دەل بوسكەگە مۇمكىن جاس تولقىنعا سەنىم ارتقانى ءجون بولار ما ەدى؟.. تاعى ءبىر سەبەپ - يسپانيالىقتار فۋتبول ماۋسىمىنان كەيىن ايىعا المادى. ەستەرىڭىزدە بولسا، چەمپيوندار ليگاسىنىڭ فينالىندا يسپانيانىڭ قوس كومانداسى ءوزارا مىقتىنى انىقتاعان ەدى. جۇرتتىڭ ءبارى مۋنديالعا دايىندالىپ جاتقاندا بۇل فۋتبولشىلار ەۋروماۋسىمدى ءساتتى اياقتاۋعا بارىن سالىپ تەر توگىپ جاتتى.

ءۇشىنشى سەبەپ - بارسەلوناداعى ويىن داعدارىسى. بيىلعى ماۋسىمدا كاتالوندىقتاردى سىنعا الماعان مامان بولمادى دەسەك ارتىق ايتقاندىق بولماس. ال يسپانيا قۇراماسى مەن بارسەلونانىڭ نەگىزىن ءبىر ويىنشالار قۇرايتىنىن جانە دە ولاردىڭ ءبىر تاكتيكانى قولداناتىنىن ەسكەرەتىن بولساق، بۇل ءسوزدىڭ دە جانى بار. ءيا، شىن مانىندە، «تيكي- تاكا» ستيلى بۇگىندە وزەكتىلىگىنەن ايىرىلعان سەكىلدى، وعان قارسى قالاي ويناۋ كەرەك ەكەنىن تالاي مىقتى باپكەرلەر كورسەتىپ بەردى. ال كونفەدەراتسيا كۋبوگىنىڭ فينالىندا برازيليادان وڭباي ۇتىلعان يسپانيا ول جەڭىلىستەن ساباق الماعان بولىپ شىقتى.

سوڭعى جىلدارداعى الەم چەمپيوناتتارىنا كوز جۇگىرتسەك، مىقتىنىڭ ماسقارا بولىپ، چەمپيوندىق تاقتان ءتۇسۋى ناعىز ۇردىسكە اينالىپ كەلە جاتقانىن بايقاۋعا بولادى. سونىمەن سانامالاپ كورەيىك.

2002، فرانسيا

سول جىلى الەم جانە ەۋروپا چەمپيوندارى فرانسۋزدار جاپونيا مەن كورەياعا دودانىڭ باستى فاۆوريتى ەسەبىندە كەلگەنى ەستە. الايدا جاراقات العان زيدانسىز ءۇشجولاقتىلار الدىمەن سەنەگالعا ەسە جىبەرسە، كەيىن ۋرۋگۆاي قاقپاسىنا دوپ سوعا المادى. شەشۋشى كەزدەسۋگە زيزۋدىڭ شىققانى دا كومەكتەسپەدى، پسيحولوگيالىق تۇرعىدان ساعى سىنعان روجە لەمەرر شاكىرتتەرى دانيادان 0:2 ەسەبىمەن ۇتىلىپ، ۇيلەرىنە ەرتە قايتتى. بۇل قۇرامانىڭ نەگىزىن دە قارتايعان جۇلدىزدار قۇراعانىن ەسكە سالا كەتەيىك.

2010، يتاليا

وڭتۇستىك افريكادا الەم چەمپيوندارى تاعى دا توپتىق سىندا ءسۇرىندى. پاراگۆاي، سلوۆاكيا، جاڭا زەلانديامەن ءبىر توپقا تۇسكەن يتالياندىقتار سوڭعى ءتورتىنشى ورىن الادى دەپ ەشكىم ويلاماعان ەدى. بىردە ءبىر جەڭىسكە قول جەتكىزە الماعان مارچەللو ليپپيدىڭ كومانداسى بار ابىرويىن ايرانداي توكتى.

2014، يسپانيا

سوڭعى ءتورت الەم چەمپيوناتىنىڭ ۇشەۋىندە كەشە عانا دۇنيەنى ءدۇر سىلكىندىرگەن فۋتبولشىلاردىڭ ورتاڭقول كوماندالاردىڭ وزىنە الدەرى جەتپەي جاتتى. يسپانيا دا بۇعان دەيىن فرانسيا مەن يتاليانىڭ ءجۇرىپ وتكەن جولىن قايتالاماس ءۇشىن ولاردىڭ جىبەرگەن قاتەلىكتەرىن ەسكەرۋى قاجەت ەدى. ەندى مىنە «التىن قۇرام» ەلگە قايتۋعا ءماجبۇر. حاۆي، حابي الونسو سەكىلدى جۇلدىزدار ەندى قۇرامادان كەتەتىنىن مالىمدەگەن ەدى. چەمپيونداردىڭ بۇلاي كەتكەنى وكىنىشتى، ارينە.

P. S. بۇل فۋتبول. الاڭدا كىم جەڭىسكە جەتەتىنىن كەيدە بولجاپ ءبىلۋ مۇمكىن ەمەس. الەمدەگى №1-سپورت وسىمەن دە قىزىقتى. دۇنيە كەزەك. بۇگىن شىڭ باسىندا باسقالارعا جوعارىدان قاراپ تۇرعان سپورتشىلار ەرتەڭ جانكۇيەر الدىندا قارابەت بولىپ، ولاردان كەشىرىم سۇراۋعا ءماجبۇر بولىپ جاتادى.

جەڭىلىستەن كەيىن باس كوتەرە بىلەتىن ەر مىنەزدى فۋتبولشىلاردىڭ ونەرىنە ءسۇيسىنىپ قارايتىن ءبىزدىڭ جاستارعا وسى جايت ۇلكەن ومىرلىك ساباق بولسىن دەپ تىلەيىك. ال ءبىز برازيليادا جاڭا چەمپيوننىڭ ەسىمىن بىلەتىن بولامىز. يسپانيا بوساتقان «تاققا» الداعى ءتورت جىل بويى كىم جايعاسادى؟

سوڭعى جاڭالىقتار