ا ق ش- تىڭ الپاۋىت كومپانياسى ەكى كۇندە 200 ميلليارد دوللار جوعالتتى
ينۆەستورلار الەمدەگى ەڭ مىقتى كومپانيا سانالاتىن Apple- ءدىڭ الەمنىڭ ەكىنشى ەكونوميكاسىمەن جۇمىس ىستەۋى شەكتەلە مە دەپ الاڭداپ وتىر. ال قىتاي وزدەرى وندىرگەن چيپپەن جابدىقتالعان جاڭا سمارتفونىن ساتىلىمعا شىعاردى. قىتاي Apple ونىمدەرىن ەڭ كوپ تۇتىناتىن ەل سانالادى. بىلتىر كومپانيا تابىسىنىڭ بەستەن ءبىرى وسى مەملەكەتتەن تۇسكەن. البەتتە Apple ءوز ونىمدەرىنىڭ ساتىلىمىن ءار ەل بويىنشا ءبولىپ كورسەتپەيدى. دەگەنمەن زەرتتەۋمەن اينالىساتىن تەحينسايت ساراپشىلارى وتكەن توقساندا ا ق ش- قا قاراعاندا قىتايدا Iphone كوبىرەك ساتىلعانىن ايتىپ وتىر. ا ق ش- تىڭ الپاۋىت كومانياسى دا ءونىمىنىڭ باسىم بولىگىن قىتاي زاۋىتتارىندا جينايدى. ءبىراق رەسمي بەيجىڭ مەملەكەتتىك قىزمەتشىلەرگە، ءىرى كومپانيالارعا Apple ونىمدەرىن پايدالانۋعا تىيىم سالۋدى كۇشەيتپەكشى. بۇل تۋرالى Wall Street Journal جازدى. وسىلايشا الەمدەگى ەكى جۋان دەرجاۆانىڭ تەكە- تىرەسى كۇشەيىپ بارادى. بۇل حابار تاراعان ەكى كۇننىڭ ىشىندە Apple 200 ميلليارد دوللار جوعالتتى. ۆەتنامدا جۇرگەن ا ق ش پرەزيدەندى دجو بايدەن بىردەن رەاكسيا ءبىلدىردى.
دجو بايدەن، ا ق ش پرەزيدەنتى:
- مەن شىنايى دۇرىس قارىم- قاتىناستى ورناتقىم كەلەدى. دەگەنمەن قازىر قىتاي ساۋدا جانە باسقا دا ماسەلەگە بايلانىستى ەرەجەلەردى وزگەرتە باستادى. ماسەلەن، ءبىر دە ءبىر قىتاي، قىتاي ۇكىمەتىندە ىستەيتىن ازاماتتار باتىستىڭ تەلەفوندارىن پايدالانا المايدى دەگەن سياقتى شەكتەۋلەر. مەن قىتايمەن اراداعى بايلانىس دۇرىستالىپ كەلەدى دەگەنگە كوز جەتكىزگىم كەلەدى.
دجو بايدەن قىتايدىڭ دامۋىن تەجەگىسى كەلمەيتىنىن ايتتى. ءبىراق ءۇندى- تىنىق مۇحيتى ايماعىنا قاۋىپ توندىرەتىن ماتەريالدى ساتىپ، ولاردىڭ كوبىرەك يادرولىق قارۋدى ءوندىرۋ قاۋقارىن كۇشەيتكىسى كەلمەيتىنىن مالىمدەدى.
ءدال وسى ۋاقىتتا بەيجىڭ دە بەيقام وتىرماعانىن بايقاتتى. Apple ونىمدەرىنە تىيىم تۋرالى حابارلانعان سوڭ، بەيسەنبىدە وزدەرى شىعارعان فلاگماندىق سمارتفوندى تانىستىردى. ونىڭ ارتىقشىلىعى سول - قىتايلىق چيپپەن جابدىقتالعان. وسىلايشا بەيجىڭ ۆاشينگتونعا ءچيپتىڭ ەكسپورتتىق باقىلاۋىنا قاراماستان تەحنولوگيالىق جەتىستىگىن كورسەتكەندەي. دەگەنمەن ساراپشىلار كەلەر اپتالاردا تانىستىرىلاتىن Apple ونىمدەرىنە قاراعاندا بۇل چيپتەردىڭ ەكى بۋىنعا قالىپ جاتقانىن مويىندايدى.
www.24.kz
