اقتاۋداعى كونسەرتتە 200 دەن استام بالا اداسىپ قالعان
بۇل تۋرالى ماڭعىستاۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
وڭىردەگى ءىرى مۇناي كومپانياسى مەرەيتويىنا وراي 30-تامىز كۇنى تەڭىز جاعالاۋىنداعى امفيتەاترعا كونسەرت وتكىزگەن. رەسپۋبليكاعا تانىمال انىشىلەر ونەر كورسەتكەن كونسەرتتى تاماشالاۋعا بارعانداردىڭ قاتارى كوپ بولعان. ءىس- شارانى كورۋگە بارعان 200 دەن استام بالانىڭ اداسىپ قالعانى تۋرالى پوليتسەيلەرگە حابارلاما ءتۇستى.
«قاۋىپسىزدىكتى قامتاماسىز ەتۋ ماقساتىندا ءىس- شاراعا 300 گە جۋىق پوليتسيا قىزمەتكەرى جۇمىلدىرىلدى. بالالاردىڭ جوعالعانى تۋرالى كەلىپ تۇسكەن وتىنىشتەردىڭ جالپى سانى - 200. اداسىپ كەتكەن بالالاردىڭ ەڭ كىشىسى 3 تە، ۇلكەنى 15 جاستا بولدى. ولاردىڭ بارلىعى تابىلىپ، ات- انالارىنا امان- ساۋ تاپسىرىلدى. اۋا رايىنىڭ سالقىنداۋىنا بايلانىستى جەتكىنشەكتەر توڭىپ قالماۋ ءۇشىن اۆتوبۋسپەن جاقىن ماڭداعى ۋچاسكەلىك پوليتسيا بولىمىنە جەتكىزىلدى. بالالاردى ىزدەپ، تابۋ 15 مينۋتتان 1 ساعاتقا دەيىنگى ۋاقىتتى الدى»، - دەلىنگەن باسپا ءسوز مالىمەتىندە.
