تەمىرتاۋدا ىشىمدىك ىشكەن كولىك جۇرگىزۋشىسى پوليتسەيدى 200 مەتردەي سۇيرەپ وتكەن
بۇل تۋرالى قازاقپارات polisia.kz تەلەگرام كانالىنا سىلتەمە جاساپ حابارلايدى.
وقيعا 11-اقپان كۇنى، ساعات 00.35 شاماسىندا بولعان. تەمىرتاۋ قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى بەيبىتشىلىك داڭعىلىنىڭ بويىندا قىزمەتتىك كولىكتىڭ ارنايى داۋىس شىعارعىش قۇرالى ارقىلى جەڭىل اۆتوكولىكتى توقتاتادى. كولىكتىڭ 31 جاستاعى جۇرگىزۋشىسى قۇجاتتارىنىڭ جوقتىعىن ايتادى. ءتارتىپ ساقشىلارى ودان ىشىمدىكتىڭ ءيىسىن سەزىپ، كولىكتەن ءتۇسۋىن تالاپ ەتەدى. سول مەزەتتە، جۇرگىزۋشى كولىكتىڭ ەسىگىن جاپپاي، وقيعا ورنىنان قاشپاق بولادى. ءتارتىپ ساقشىلارىنىڭ ءبىرى كولىك سالونىنا سەكىرىپ مىنەدى، ءبىراق ءبىر اياعى سىرتتا قالىپ قويادى. جۇرگىزۋشى ءتارتىپ ساقشىسىن 200 مەتر سۇيرەپ، جول جيەگىنە شىعىپ بارىپ توقتايدى.
پوليتسيا قىزمەتكەرلەرى جۇرگىزۋشىنى ناركولوگيا ورتالىعىنا جەتكىزىپ، ونىڭ ورتا دارەجەدە ىشىمدىك ىشكەن كۇيدە بولعانى انىقتالدى. وعان قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 608، 613 جانە 667-باپتارىنا سايكەس حاتتامالار تولتىرىلدى. سوتتىڭ شەشىمىمەن 30 تاۋلىككە اكىمشىلىك قاماۋعا الىنىپ، 7 جىلعا جۇرگىزۋشى قۇقىعىنان ايرىلدى.