پوليتسيا قاڭتار وقيعاسىنا قاتىستى 200 دەن استام ءىستى قاراپ جاتىر
بۇل تۋرالى ق ر ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«پوليتسيا تەرگەۋشىلەرى قاڭتار وقيعاسى بويىنشا 4642 قىلمىستىق ءىس قوزعادى. ال 971 ىسكە قاتىستى تەرگەۋ اياقتالدى، ونىڭ ىشىندە 609 ايىپتالۋشىعا قاتىستى ءىس سوتقا جولداندى. سوت تالقىلاۋىنىڭ ناتيجەلەرى بويىنشا 539 ايىپتالۋشىعا قاتىستى ۇكىم شىقتى. ولاردىڭ 425 ىنە باس بوستاندىعىن شەكتەۋ جازاسى بەرىلسە، 104 ءى اۋىر ءارى اسا اۋىر قىلمىستار جاساعانى ءۇشىن باس بوستاندىعىنان ايىرىلدى»، - دەدى سانجار ءادىلوۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، قازىر پوليتسيا تەرگەۋشىلەرى 276 ءىستى قاراپ جاتىر.
«جالپى، پوليتسيا تەرگەۋشىلەرى 40 مىڭعا جۋىق تەرگەۋ ارەكەتتەرىن جۇرگىزدى. 15 مىڭنان استام ازاماتتان جاۋاپ الىندى جانە 2,5 مىڭنان استام ساراپتاما تاعايىندالدى. زارداپ شەككەن ادامدارعا 360 ميلليون تەڭگەگە جۋىق سوماعا باعالانعان زالالدى وتەۋ قامتاماسىز ەتىلدى. ونىڭ ىشىندە سوتقا دەيىنگى تەرگەۋ جانە ىستەردى سوتتا قاراۋ ساتىسىندا كۇدىكتىلەر ءوز ەرىكتەرىمەن جابىرلەنۋشىلەرگە 15 ميلليون تەڭگەدەن استام سوماعا زالالدى وتەدى»، - دەدى ۆەدومستۆو وكىلى.
