ەلوردادا كۇن سايىن 200 گە دەيىن ناۋقاس كوروناۆيرۋسپەن اۋرۋحاناعا تۇسۋدە
بۇل تۋرالى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتتى، دەپ حابارلايدى قازاقپارات ءتىلشىسى.
«قابىلدانعان ءىس-شارالاردىڭ بارلىعى كوروناۆيرۋستىق ينفەكسيامەن اۋىراتىنداردىڭ سانى كۇن سايىن ارتىپ كەلە جاتقانىن كورسەتەدى. ءبىز توسەك-ورىن سانىن كوبەيتۋگە جانە ادامي رەسۋرستاردى ۇلعايتۋعا ءماجبۇرمىز. جۇقپالى اۋرۋلار اۋرۋحانالارىنا تاۋلىگىنە 150-200 ادام جاتقىزىلا باستادى»، - دەدى ول.
باسقارما باسشىسىنىڭ اتاپ وتۋىنشە، 2001 ينفەكتسيالىق توسەك-ورىننىڭ 598 ءى عانا بوس. ونىڭ ىشىندە 36 رەانيماتسيالىق توسەك-ورىن بار.
«جانساقتاۋ بولىمىندە ءدال قازىر 111 ناۋقاس، ك ۆ ي- مەن 100 ادام جاتىر. اۋىر جاعدايدا 57 ناۋقاس، وتە اۋىر حالدە 43 ناۋقاس بار. ال 20 سى وكپەنى جاساندى جەلدەتۋ اپپاراتىنا قوسىلعان»، - دەدى تيمۋر مۇراتوۆ.
