كورەي قىزى ابايدىڭ 200 ولەڭىن جاتقا بىلەدى
اقمايا اۋىلىنداعى №49 مەكتەپتە 10-سىنىپتا وقيتىن ەلەنانىڭ تالابى تاۋداي. ءجۇزى باسقا بولعانىمەن، جۇرەگى قازاق دەپ سوعادى. ابايدىڭ «ادامزاتتىڭ ءبارىن ءسۇي، باۋىرىم دەپ» دەگەن ءسوزىن ومىردەگى باستى ۇستانىمى سانايدى.
«اباي ولەڭدەرىن 5-سىنىپتان باستاپ وقىپ، جاتتاپ ءجۇرمىن. اقىن اتامىزدىڭ اسىل سوزدەرى ومىرلىك تاجىريبەدە كوپ كومەگىن تيگىزەدى. بولاشاقتا دا اباي ولەڭدەرىن جاتتاپ، قاراسوزدەرىن تولىقتاي مەڭگەرگىم كەلەدى. قازىر اقىننىڭ 200 ولەڭىن جاتقا ايتىپ ءجۇرمىن. بولاشاقتا فيلولوگ بولسام دەيمىن» ، - دەيدى وقۋشى ەلەنا.
ولەڭدى شابىتپەن وقىپ، ءسوزدىڭ ءمانىسىن سالماقتاي بىلەتىن ونەرلى ورەن تالاي سىندا دارالاندى. رەسپۋبليكالىق، وبلىستىق اباي وقۋلارىندا توپ جاردى. پاندىك وليمپيادالاردا جۇلدەگەر اتاندى.
«ەرەكشەلىگى، ەلەنا قازاق بالالارىمەن بىرگە سايىسقا ءتۇسىپ، بايقاۋدا جەڭىمپاز اتانىپ ءجۇر. وعان بەسىنشى سىنىپتان ساباق بەرىپ كەلە جاتىرمىن. ەلەنا ءاردايىم بىلسەم، كورسەم دەپ العا ۇمتىلىپ جۇرەدى. ول تەك قانا ابايدى ەمەس، قازاقتىڭ باسقا دا اقىندارىنىڭ ولەڭىن وقيدى. سودان وي تۇيە بىلەدى. دوستارىمەن دە جاقسى ارالاسادى، جاتسىنبايدى، بارلىعىمەن تەڭ وي بولىسە الادى» ، - دەيدى №49 ورتا مەكتەپتىڭ ءمۇعالىمى بيبىگۇل سۇلتانوۆا.
ەلەنا كيم قازاق ءتىلىن جانە مادەنيەتىن تەرەڭ بىلۋگە ىنتالى. سوندىقتان، قازىرگى كۇنى ول باتىرلار جىرى مەن پاتريوتتىق سارىنداعى ولەڭدەردى دە جاتتاپ ءجۇر.
يبراش ءالي
Baq.kz
