تۇرعىن ءۇي قۇرىلىس جيناق بانكىنىڭ 200 مىڭعا تارتا سالىمشىسى وتەماقىدان قاعىلۋى مۇمكىن

استانا. قازاقپارات - بۇگىنگى كۇنى «تۇرعىن ءۇي قۇرىلىس جيناق بانكى» بويىنشا وتەماقى تولەۋگە جاتاتىن 110 مىڭعا جۋىق سالىمشىمەن قوسىمشا كەلىسىمشارتقا قول قويدى.

بۇل وتەماقى تولەۋگە جاتاتىن دەپوزيتتەردىڭ 20 پايىزىن عانا قۇرايدى. مۇنداي قارقىنمەن 200 مىڭعا تارتا سالىمشى بانكپەن اراداعى قوسىمشا كەلىسىمشارتتار جاساۋ مەرزىمىنە ۇلگەرمەۋى مۇمكىن، دەپ حابارلايدى بانكتىڭ باسپا ءسوز قىزمەتى.

ەسكە سالا كەتەيىك، بانكپەن سالىمشىلار اراسىندا وتەماقى بويىنشا قوسىمشا كەلىسىمشارتتار جاساسۋ 2016 -جىلدىڭ 8 -اقپانىنان باستالعان بولاتىن. وسى ۇدەرىسكە بەرىلگەن 114 كۇنتىزبەلىك كۇندى ەسەپكە العاندا كۇن سايىن ورتا ەسەپپەن 4096 قوسىمشا كەلىسىمشارتتار جاسالۋى كەرەك بولاتىن. الايدا، بۇگىنگى كۇنى قابىلدانىپ جاتقان وتىنىمدەردىڭ ورتاشا سانى ەكى جارىم مىڭنان اسپايدى.

«تۇرعىن ءۇي قۇرىلىس جيناق بانكىمەن» قوسىمشا كەلىسىمشارتتار جاساۋ مەرزىمى 2016 -جىلدىڭ 1 -ماۋسىمىندا اياقتالاتىنىن ەسكەرسەك، وندا جوسپارلانعان كەلىسىمشارتتاردىڭ تەك جارتىسىنا عانا قول قويىلۋى مۇمكىن»، - دەلىنگەن باسپا ءسوز بايانىندا.

اتاپ ايتقاندا، قاراعاندى وبلىسى بويىنشا وتەماقى تولەۋگە جاتاتىن 31433 دەپوزيتتىڭ 5970 ىنە عانا قوسىمشا كەلىسىمشارتتار جاسالعان. اقتوبە وبلىسىندا - 32490 سالىمشىنىڭ 7843 ى، اتىراۋ وبلىسىندا - 17479 سالىمشىنىڭ 3070 ى، الماتى قالاسىندا - 56295 سالىمشىنىڭ 13188 ى، استانا قالاسىندا - 62049 سالىمشىنىڭ 18160 ى عانا قوسىمشا كەلىسىمشارتتار جاساسقان.

«ەگەر دەپوزيتتەر سوماسىنا شاعا قاراستىرساق، 1 ميلليون تەڭگەگە جەتپەيتىن 352860 جانە 1 ميلليون تەڭگەدەن جوعارى 26515 سالىم بويىنشا كەلىسىمشارتتار جاسالماي وتىر. وسىلايشا، بۇگىنگى تاڭدا وتەماقى ماقساتىندا بولىنگەن 21 ميلليارد تەڭگەدەن استام سوماعا سۇرانىم بولماۋى مۇمكىن. «تۇرعىن ءۇي قۇرىلىس جيناق بانكى» باستاپقى كەزدەن 467 مىڭ كەلىسىمشارت بويىنشا وتەماقى تولەنەتىنىن جاريالاعان بولاتىن. ونىڭ ىشىندە سالىم مولشەرى 1 ميلليون تەڭگەدەن اساتىن سالىمشىلار دا قامتىلعان ەدى. وتەماقى تولەۋگە جاتاتىن سالىم سوماسى قازىرگى كۇنى 153,1 ميلليارد تەڭگەنى قۇراپ وتىر. وسىعان بايلانىستى سالىمشىلار بەلگىلەنگەن مەرزىم ىشىندە بانكپەن قوسىمشا كەلىسىمشارتتار جاساپ ۇلگەرۋى كەرەك. بۇل رەتتە پروتسەدۋرانى ونلاين- رەجيمدە ەلەكتروندىق- سيفرلىق قولتاڭبانى پايدالانا وتىرىپ جۇزەگە اسىرۋعا بولادى (www.egov.kz نەمەسە بانكتىڭ رەسمي سايتى www.hcsbk.kz)»، دەلىنگەن باسپا ءسوز بايانىندا.